107 پارت دێ پشكداریێ د هه‌لبژارتنان دا كه‌ن

جڤاتا کۆمسیاران 83 کارتێن دەنگدانێ هنارتیینه‌ بۆ کۆمپانیا کۆری

ڕاوێژکارێ سەرۆکێ جڤاتا وه‌زیران ل ئیراقێ بۆ کاروبارێن هەڵبژارتنان ڕاگەهاند، ژ سه‌رجه‌مێ 249 حزبان هاتینه‌ تۆماركرن 107 حیزب دێ پشكداریێ د هه‌لبژارتنان دا كه‌ن.

حسێن هنداوی، ڕاوێژکاریێ سەرۆکێ جڤاتا وه‌زیرانی ل ئیراقێ بۆ کاروبارێن هەڵبژارتنان د لێدوانه‌کێ دا بۆ ئاژانسا نووچه‌یێن نیشتیمانیا ئیراقێ ڕاگەهاندییه‌، جڤاتا کۆمسیاران 83 کارتێن دەنگدانێ هنارتیینه‌ بۆ ئەوێ کۆمپانیا کۆری کەوئامێرێن ئەلکترۆنیێن تایبەت ب دەنگدانێ دروستکرینه‌، ب مەبەستا پشکنینا و گونجاندنێ دگەڵ ئامێران.

ئاماژە ژى دا، كو هه‌تا نوكه‌ 16 ملیۆن دەنگدەر ناڤێن خوه‌ ل تۆمارا دەنگدەران نووكرینه‌ڤه‌، د ده‌مه‌كیدایه‌ كو  25 ملیۆن کەس مافێ دەنگدانێ هەیە د هەڵبژارتنێن داهاتیدا.

هه‌نداوی‌ ئه‌و چه‌نده‌ ژى ئاشكرا كر، كو کۆمسیۆنێ هەڵبژارتنێن ڤێ داویێ ئاستێ کار و چالاکییەکێن خۆ زێده‌تركرینه‌، بو مەبەستا ته‌مامكرنا  ئامادەکاریێن لۆجستیێن تایبەت ب دۆسیەیا هەڵبژارتنان

هه‌روه‌سا دیاركر ژى، كو هەماهەنگی و هه‌ڤکارییەکا مه‌زن و بەردەوام هەیە دناڤبه‌را کۆمسیۆنێ و پسپۆڕێن سەر ب نەتەوەێن ئێكگرتى و پسپۆڕێن ناڤدەولەتی سەبارەت ب شێوازێ بژاردن و ژێكجوداكرنا دەنگان و ب کارئینانا ئامێرێن پێشکەفتى دڤى بواریدا.

ڕاوێژکارێ سەرۆکێ جڤاتا وه‌زیرێن ئیراقێ بۆ کاروبارێن هەڵبژارتنان ئاشكرا ژى كر، ژ سه‌رجه‌مێ  249 حزبێن هاتینه‌ توماركرن  107 حیزب پشكدارییا هەڵبژارتنان دکه‌ن و 62 حزبێن دى ژى د قۆناغا ناڤ تۆمارکرنێ، بەلێ حزبێن دى ژبه‌ر ئه‌گه‌رێن تایبه‌ت ب خوه‌ ڤه‌ بڕیاردایه‌ پشكدارى هەڵبژارتنان نەکەن.