ئه‌ڤرۆ 33 سال د سه‌ر كیمیابارانكرنا باژارێ هه‌له‌بجه دا ده‌ربازدبن كو ژ ئه‌گه‌را وێ 5000 وه‌لاتی شه‌هیدبوون و هزارێن دی ژی برینداربوون و سالانه د ڤێ رۆژێ دا ل سات 11 یێ سپێدێ بۆ ده‌ما پێنچ خۆله‌كان هاتن و چوون ل هه‌موو كوردستانێ دهێت راوه‌ستاندن.
د رۆژەکا وەکی ئەڤرۆ دا ل 16 مەھا ئادارا سالا 1988 پشتی كو د بەردەوامیا شەرێ دناڤبەرا ھەر دو وەلاتێن ئیراق و ئیرانێ دا ، ئیرانێ ھێزێن خوە ژ باژاری ڤەکێشاین و بەری ھاتنا رژێما ئیراقێ بو ناڤا باژاری ، فرۆکێن ئیراقی ل سات 11 یێ سپێدێ باژارێ هه‌له‌بجه ب گازا سیانی کیمیا باران کر و د وێ کیمیا بارانا کۆمکوژی دا 5000 ھزار کەس شەھیدبوون، و 7 تا 10 ھزار کەس ژی بریندار بوون،
هه‌روه‌سا زێدەتری 1000 کەسان تا نھا ساخله‌مییا وان نە یا جێگیرە، 25 بریندار کو تا نھا رۆژانە پێدڤی ب گازا ئۆکسجینی نە ژ بۆ بەردەوامییا ژیانێ، زێدەتری ٧٥ زارۆکان تا نها دبێ سەروشوینن.
پشتی کومکوژییا د ده‌رهه‌قا كوردان دا ل هه‌له‌بچه هاتییه كرن، ئێکسەر ھەردو وەلاتان ب سوچا کۆمکوژیا کیمیا بارانا باژارێ ھەلەبچە ھەڤدو تۆمەتبارکرن ، لێ ل گۆرەی وان وێنە و ڤیدیویێن ب کامیرا وێنەگرێ ئیرانی (جولستان کاوە) ھاتین تۆمارکرن ، زێدەباری چەندین بەلگه‌یێن دی دیاربوو كو ئیراقێ باژارێ هه‌له‌بجه كیمیابارانكرییه.
