رێڤەبەریا گشتی یا گەشتوگوزاری ل پارێزگەھا دھۆکێ وەکو ھەرسال د ھەموو ھەلکەفتنان دا پلانەکێ دادرێژیت و خزمەتا گەشتیاران دکەت. رێوارمحەمەد رەشید، پەیڤدارێ رێڤەبەریا گشتی یا گەشتوگوزارێ ل پارێزگەھا دھۆکێ تایبەت بۆ خانی نیوز گۆت: ئەڤسالە ژی وەکو سالێن بووری رێڤەبەرییا وان پلانەکا دارێشتی ھەیە و پازدە تیم پێکئیناینە و ئەڤ تیمە دێ ل زالگەھێن سەرەکی یێن کو گەشتیار تێرا دھێنە دناڤا پارێزگەھا دھۆکێ دا ودێ ئاڤ و شرینی و پرۆشەر و نەخشەیێ پارێزگەھا دھۆکێ ل سەر گەشتیاران ھێنە بەلاڤکرن و دیسان دێ چەندین لافیتە یێن بخێرھاتنا گەشتیاران ب زمانێن کوردی و عەرەبی ل زالگەهـ و جھێن گەشتیار قەست دکەنێ دێ ھێن ھەلاویستن و د ھەرسێ رۆژێن نەورۆزێ دا کیسکێن بەرمایکان دێ ل سەر سەیرانییان ھێنە بەلاڤکرن ژپێخەمەت پاراستنا ژینگەھا پارێزگەھا دھۆکێ.
