ئه‌ڤرۆ سالڕۆژا سێداره‌دانا پێشه‌وا قازى محه‌مه‌دی یه‌

قازى موحه‌مه‌د كورێ قازى عه‌لى یه‌، ل سالا 1893ێ زاینى ژ بنه‌ماله‌كا بناڤ و ده‌نگا باژێرێ مه‌هاباده‌، و جهێ رێزێ بوو ژلایێ ده‌ستهه‌لاتداران و به‌رپرسێن حكومه‌تێ ڤه‌، قازى د ژیێ زارۆكینێ دا و د گه‌نجاتیێ دا زۆر یێ مژوولى زانستى و فێربوونا زمانان بوویه‌، و گه‌له‌ك حه‌ز ژ تێكه‌لییا دگه‌ل زانایان هه‌بوو.

قازى موحه‌مه‌د، مرۆڤه‌كێ فه‌رهه‌نگ دوست بوو، و د هه‌مان ده‌م دا خه‌باتكه‌ره‌كێ نیشتمان په‌روه‌ربوو و حه‌ز ژ گه‌لێ خوه‌ دكر، به‌رى دامه‌زراندنا كۆمارێ د رۆژناما كوردستان دا ب ناڤێ پێشه‌وا به‌حس لێ دهاته‌ كرن، و پشتى دامه‌زراندنا كۆمارا كوردستان ب فه‌رمى ناسناڤێ پێشه‌وا پێهاته‌ دان، و ئه‌ڤ ناڤه‌ هه‌تا نوكه‌ د ناڤ خه‌لكى دا به‌ربلاڤه‌.

قازى موحه‌مه‌د، ل 31-3-1947 ل مه‌یدانا چوارچرا ل مهابادێ و ژلایێ ده‌ستهه‌لاتدارانڤه‌ ئیرانێ ڤه‌ هاته‌ سێداره‌دان.

ته‌رمێ شه‌هید قازى موحه‌مه‌د هه‌ر ل وێ رۆژێ ل سه‌ر ملێن خه‌لكێ شه‌ره‌فمه‌ندێ مه‌هابادێ ل گۆرستانا مه‌لا جامى هاته‌ ڤه‌شارتن، و هه‌تاكو نوكه‌ جهێ گۆرێ وى ل ژێر چاڤدێریێ دایه‌.

ده‌قێ وه‌سیه‌تناما قازى

گه‌لێ منێ مافخواز كور و كچ و خویشك و برایێن من یێن خۆشتڤى. نوكه‌ ل دووماهیك چركێن ژیانا خوه‌دا من دڤێت چه‌ند  دێره‌كا بۆ هه‌وه‌ بنڤیسم.

پشتا خوه‌ ب ئێك دوو گرێده‌ن ل به‌رامبه‌رى دوژمنێ زۆردار دا و قاره‌مانه‌ راوه‌ستن، خوه‌ نه‌فرۆشنه‌ دوژمنى.

هه‌كه‌ر كه‌سه‌كى كار پێ چێدبیت بهێلن بلا بكه‌ت، و ئاسته‌نگان بۆ دروست نه‌كه‌ن.

ئه‌گه‌ر من به‌رپرسیاره‌تییا مه‌زن نه‌با ئه‌ز ل بن حكومێ سێدارێ نه‌دبووم.