ده‌ڤه‌را كانی ماسێ هاته‌ تۆپبارانكرن

زنجیرا چیایێ گابنێركی و سه‌ركێ دێشێش یێن سه‌ر ب ده‌ڤه‌را به‌رواری بالا ب دژواری هاتنه‌ تۆپبارانكرن.

سه‌ربه‌ست سه‌بری ئاكره‌یی، رێڤه‌به‌رێ ناحیا كانی ماسێ بۆ خانی نیوز راگه‌هاند، سه‌ركێ دێشێشێ ئه‌وێ دكه‌ڤیته‌ پشتا هه‌ردو گوندێن سه‌ره‌رو و دێشێش ئه‌ڤرۆ‌ ل ده‌مژمێر 10 سپێدێ ژلایێ تۆپخانا توركیا ڤه‌ ب دژواری هاته‌ تۆپباران كرن و دو گۆله‌ تۆپان ئارمانجا خوه‌ زێده‌كر و نێزیكێ گۆندێ دێشێشێ كه‌فتن.

گۆت ژی: دهه‌مان ده‌م دا سه‌رده‌ره‌جا هێسێ ئه‌وا دكه‌ڤیته‌ داویا  زنجیرا چایێ گابنێركێ ژ لایێ فرۆكێن شه‌ركه‌رێن توركیا ڤه‌ هاته‌ تۆپبارانكرن، هه‌رچه‌نده‌ زیانێن گیانی نه‌بووینه‌ لێ ئه‌ڤ تۆپبارانه‌ بوویه‌ سه‌ده‌ما ترس و دودولیێ ل نك خه‌لكێ ڤان گوندان.

ژ ئالیه‌كێ دی ڤه‌ ژێده‌ره‌كی دیار كر، حكومه‌تا توركیا هێزه‌كا مه‌زن ل سه‌ربازگه‌ها ئه‌له‌مینێ كۆمكرییه‌ و نیازا وێ یه‌كێ هه‌یه‌ گۆپیتكا چیایێ سه‌ركێ دێشێشێ بگرن و ئه‌گه‌رێ ڤێ تۆپبارانێ ئه‌و بوویه.‌

سه‌ركێ دێشێشێ ب جهه‌كێ ستیراتیجی ل ده‌ڤه‌رێ دهێته‌ زانین و ب بلندترین گۆپیتك‌ ل سنورێ پارێزگه‌ها دهوكێ دهێته‌ دانان كۆ بلنداهییا وی دگه‌هیته‌ 2700م ل سه‌ر روویێ ده‌ریای و نێزیكێ سێ كلم ژ سنۆری دووره.