دھۆک: ٤ بنگەھێن نوو یێن پشکنینا کۆرۆنایێ دێ ھێنە ڤەکرن

رێڤەبەریا گشتییا ساخلەمییا پارێزگەھا دھۆکێ بریار دایە سوبە رۆژا ئێکشەمبی 2021/4/11 چار بنگەھێن نوو یێن پشکنینا کۆرۆنایێ ل سەنتەرێ باژارێ دھۆکێ بھێنە ڤەکرن، ئارمانچ ژێ ئەوە وەلاتی تایبەتی ئەو کەسێن گۆمانا نەخۆشیێ ھەی زووتر سەرەدانا وان بنگەھان بکەن و پشکنینێن کۆرۆنایێ بکەن.
حەمزە رەزیکی، بەرپرسێ راگەھاندنا رێڤەبەریا گشتییا ساخلەمییا پارێزگەھا دھۆکێ بۆ خانی نیوز دیارکر، ئەو بنگەھێن نوو ل تاخێن شندۆخا و سەرھەلدان و مالتایێ و یازدەی ئادارێ دێ ھێنە ڤەکرن و سوبه‌ وێڤە ھەر کەسەکێ نەخۆش دشێت سەرەدانا وان بنگەھان بکەت دا پشکنین بۆ بھێنەکرن.
دەربارەی رێژا وەرگرتنا ڤاکسینێ دژی کۆرۆنایێ ژلایێ وەلاتییان ڤە، حەمزە رەزیکی خویاکر، رۆژ بۆ رۆژێ خواستا خەلکی پتر لێ دھێت بۆ وەرگرتنا ڤاکسینى، تا نھا ل پارێزگەھا دھۆکێ ھەشت ھزار وەلاتییان ڤاکسینا ئەسترازینکا وەرگرتییە و بریارە سوبه‌ ژی 2 ھزار قۆرچێن دی یێن ڤاکسینێ وەک بەھرا دھۆکێ بگەھن.
رەزیکی گۆت ژی: نھا 80 نەخۆشێن کۆرۆنایێ ل پارێزگەھا دھۆکێ ل نەخۆشخانان دا نڤاندینە و پێدڤی وەرگرتنا چارەسەریێ نە، ژ وانا 20 نەخۆشان رەوشا وان نەباشە و دبن چاڤدێریا چر دانە، لێ ب گۆتنا ناڤبری ئەو رێژە بەرامبەری حەفتیا بووری کێمتر لێ ھاتییە.