نێچیرڤان بارزانی و جینین پلاسخارت ل به‌غدایێ كۆمبوون

ئێڤارییا ئه‌ڤرۆ 10-4-2021 نێچیرڤان بارزانی سه‌رۆكێ هه‌رێما كوردستانێ ل به‌غدایێ ل گه‌ل خانم جینین پلاسخارت نوونه‌را تایبه‌تا سكرتێرێ گشتییێ نه‌ته‌وه‌یێن ئێكگرتی ل ئیراقێ كۆمبوو.

ل گۆری راگه‌هاندنه‌كا سه‌رۆكاتییا هه‌رێما كوردستانێ به‌لاڤكرییه‌، د كۆمبوونێ دا ره‌وشا ئیراقێ ژ روویێ سیاسی و ئابووری و ئێمناهیڤه‌، په‌یوه‌ندیێن هه‌ولێر و به‌غدایێ و گۆتوبێژێن چاره‌سه‌ركرنا ئاریشه‌یان، رێككه‌ڤتنا حكومه‌تا هه‌رێما كوردستانێ و حكومه‌تا ئیراقێ بۆ ئاساییكرنا ره‌وشا شنگالێ، هه‌لبژارتنێن بهێت یێن ئیراقێ، مه‌ترسیێن تیرۆرێ و گه‌فێن داعشێ هاتنه‌ گۆتوبێژكرن.

سه‌رۆك نێچێرڤان بارزانی سه‌ره‌رای باسكرنا كورتییه‌ك ل دۆر سه‌ره‌دانا خوه‌ بۆ به‌غدایێ، دووپاتی ل گرنگییا رۆلێ تیمێن نه‌ته‌وه‌یێن ئێكگرتی ل ئیراقێ كر كو د ناڤبه‌را هێز و لایه‌نان د گۆتوبێژان دایه‌ و دخوازیت د چارچۆڤێ ئه‌ركێ خوه‌ دا ل ئیراقێ بۆ چاره‌سه‌ركرنا ئاریشه‌یان هه‌ڤكارییێ بكه‌ت.

ژلایێ خوه‌ڤه‌ خانم جینین پلاسخارت خوه‌شحالییا خوه‌ یا به‌رده‌وام ب گه‌نگه‌شه‌یێن هه‌ولێر – به‌غدایێ نیشاندا و هیڤی خواستن هه‌رێما كوردستانێ و ئیراقێ ب گۆتوبێژان ل سه‌ر بنه‌مایێ ده‌ستوری بگه‌هنه‌ چاره‌سه‌ركرنا ئاریشه‌یان و هه‌موو لایه‌نێن ئیراقێ بۆ ده‌ربازكرنا ره‌وشێ و ژ بۆ ئارامی و سه‌قامگیرییێ پێكڤه‌ كاربكه‌ن