شیرەتکارێ بلندێ سەرۆکێ ھەرێما کوردستانێ بۆ کاروبارێن ژدەرڤە ل دۆر رۆلێ کوردان د دیالۆگا ستراتیجی یا ئیراقی ئەمریکی دا راگەھاند؛ ھاتنا ئیدارا نوو یا ئەمریکا بۆ سەر کاری گاڤەکا گرنکە و پێگیرییا وان ب دیالۆگێ بخوە خویا دکەت کو بریار و پێگیری گرنگن، ژ ئالییەکێ دی ژی پشکدارییا نوونەرێن ھەرێمێ د دیالۆگێ دا خالەکا ئەرێنی یە بۆ زێدەتر ھەبوونا ھەماھەنگیا زێدەتر دناڤبەرا کوردستان و ئیراقێ دا و ب شێوەیەکێ گشتی د گەل ئەمریکا، ئەڤە ژی گەلەک یا رۆھنە د چارچۆڤەیێ ھەلوەستێ ئیراقێ دا ب شێویەکێ گشتی دا کو نێرینەکا واقعی ھەبیت ل سەر پرسێن سیاسی، ئێمناھی، ئابووری، ساخلەمی و کەلتووری داکو بکارن ئەو دیالۆگا ستراتیجی د خزمەتا ھەردو ئالییان دا بیت و ھەروەسا ئەو ژی بکارن ھاریکار و پشتەڤانێن سەرکەفتنا دیالۆگێ بن.
فەلاح مستەفا د داخویانییەکا دی دا بۆ خانی نیوز ل دۆر وێ یەکێ کو ئیراق و ئەمریکا رێککەفیتنە بنگەھێن ئەمریکی ل ئیراقێ نەمینن و ئەگەر نەمان پاشەرۆژا بنگەھێن ئەمریکی ل کوردستانێ گۆت: ھەرێما کوردستانێ وەکو پشکەک ژ ئیراقێ پێگیرە ب ھەر رێککەفتنەکا د چارچۆڤێ دیالۆگا ستراتیجی یا د ناڤبەرا ئیراقێ و ئەمریکا دا دەردکەڤیت، لێ د بەیانا داویێ یا کۆمبوونێ دا پشتی گەڕا سێیێ یا دیالۆگا ستراتیجی د ناڤبەرا ئەمریکا و ئیراقێ دا باس ل وێ یەکێ ھاتییە کرن کو بەرپرسێن ئاسایشێ یێن ھەردو ئالییان دێ بەردەوامبن د ھەلسەنگاندنا پێدڤیێن ئیراقێ د قۆناغا نھا دا، ژ بەرکو ئەمریکا ل سەر داخوازییا حکومەتا ئیراقێ ل ئیراقێ یە و بۆ شەرێ داعشێ و شکەستنا وێ، ئەو بابەتە ژی دێ ژ ئالیێ ئاسایشێ ڤە ھەلسەنگاندن بۆ ھێـتەکرن و بریارێ ل سەر دەن، لێ ھەلوەستێ ھەرێما کوردستانێ د چارچۆڤێ ئیراقێ دا دێ ل گۆر وێ رێککەفتنێ بیت یا کو د دیالۆگا ستراتیجی یا دناڤبەرا ھەردو ئالییان دا دەردکەڤیت.
