سەرۆکوەزێرێن ئیراقێ و فەرماندارێ گشتیێ ھێزێن چەکدار بریار دا دەست ب لێکۆلینێ ل سەر ھێرشا شڤێدی یا ھەولێرێ بھێت کرن.
لیوا یەحیا رەسوول، پەیڤدارێ فەرماندارێ ھێزێن چەکدارێن ئیراقی راگەھاند، مستەفا کازمی بریار دایە دەست ب لێکۆلینێ ل سەر ھێرشا ھەولێرێ و جھێن دی بھێت کرن.
رەسوول ئاشکرا کر، کازمی دوپات کرییە کو ئاساییشا ئیراقێ بەرپرساتییا حکومەتێ و ھەموو ھێزێن ئەمنی یێن ئیراقێ یە، ئارمانج ژی ژ وان کارێن تیرۆرستی کو ل مەھا رەمەزانێ ھاتینە کرن ب تنێ بۆ تێکدانا ئاساییشێ یە، ھندەک بزاڤان دکەن ئالۆزیان دروست بکەن و ئاساییش و سەقامگیریێ تێکبدەن.
شڤێدی سەعەت 10 و 50 خۆلەک ب رێیا درۆنەکا تی ئێن تی کری ھێرش ل سەر بنگەھەکێ ھەڤپەیمانییا ناڤدەولەتی ل فرۆکخانەیا ھەولێرێ ھات کرن و چ زیانێن گیانی نەبوون، ھەمان دەم ھێرش ل سەر بنگەھێ سەربازی یێ سوپایێ تورکیا ل دەڤەرا باشیکێ ھاتە کرن و سەربازەکێ تورک ھات کوشتن و کچەکا سڤیل بریندار بوویە.
