پارێزگارێ دھۆکێ چەندین رێنما و راسپاردە ئاراستەی رێڤەبەرێن گشتی کرن

پارێزگارێ دھۆکێ دگەل رێڤەبەرێن گشتی ل سنۆرێ پارێزگەھا دھۆکێ کۆم بوو و دانوستاندن و ھەلسەنگاندن بۆ رەوشا ساخلەمیێ و رێنمایێن خۆپاراستنێ ژ ڤایرۆسێ کۆرۆنایی ھاتەکرن.
د. عەلی تەتەر، پارێزگارێ دھۆکێ د گەل رێڤەبەرێن گشتیێن پارێزگارێ دھۆکێ ئەڤرۆ رۆژا دوشمبی کۆم بوو و دوپاتی ل بجھئینانا رێنمایان ل ھەموو دامودەزگەھێن حکومەتێ کر، ھەروەسا بەحس ل چاوانیا شۆرکرنا دەستھەلاتان بۆ فەرمانگەھێن حکومەتێ کر و راوێژ و پێشنیار د ڤی بیاڤی دا ھاتنە وەرگرتن.
د کۆمبوونا پارێزگارێ دھۆکێ دا د گەل رێڤەبەرێن گشتی بەحس ل پتر رێکخستنا داھاتێ حکومەتێ و چاوانیا خەرجکرنێ و زێدەکرنا داھاتی ھاتە کرن، د دووڤ دا پارێزگارێ دھۆکێ راگەھاند، پێدڤیە ھەموو بزاڤان بکەن بۆ نەھێلانا بەربەست و رێگریان د ناڤبەرا حکومەت و وەلاتیان دا و بەرھەنگاربوونا ھەمی جۆرە گەندەلی و زێدەگاڤیەکێ ل دویڤ قانوون و کارناما حکومەتا ھەرێما کوردستانێ و چاکسازی بھێنە کرن ژ پێگیریا تەمام و رێکوپێک ب دەوامێ، نەھێلا رۆتینێ و بەرفرەھکرنا شەفافیەتێ و گۆرانکاریێن بەردەوام ل دووڤ پێدڤیاتیێ.

ل دوماھیا کۆمبوونێ پارێزگارێ دھۆکێ راگەھاند، ھیڤیدارن پێگیریەکا تەمام ب رێنما و راسپاردێن حکومەتا ھەرێما کوردستانێ و ل ھەموو دامودەزگەھـ و فەرمانگەھـ و رێڤەبەریان بھێتەکرن.