نێچیرڤان بارزانی، سەرۆکێ هەرێما کوردستانێ پەیامەك ب هەلکەڤتا 46 سالییا جینۆسایدکرنا کوردێن فەیلی بەلاڤکر.
دهقێ پهیاما سەرۆکێ هەرێما کوردستانێ؛
ئەڤرۆ ئەم ب دلەکێ تژی ئێش، ڕۆژا 46 سالییا كۆمهكا تاوانێن جینۆساید، دەربەدەرکرن و بێسەروشوونکرنا خویشك و برایێن خۆ یێن کوردێن فەیلی ساخ دکەین. ئەو ستەملێکریێن کو دناڤ گەلەکا دڕندانە یا ڕژێما وی سەردەمی یا عیراقێدا، ب تنێ ژ بەر کوردبوون و بەرەڤانیکرن ژ ناسنامە و مافێن ڕەوا یێن گەلێ خۆ، بهرههنگاری سێدارەدان، کوشتن، گرتن، بەرزەکرن و دەرئیخستنێ بوون و ڕەگەزنامە و سەروەت و سامان و مولکێن وان ژێ هاتنە ستاندن.
دهربهدهركرنا سەدان هزار کوردێن فەیلی و بێسەروشوینکرنا دەهان هزارێن دی، جینۆسایدەکا ڕەگەزپەرستانا بەعس بوو کو دیرۆكهكا ڕەش و ڕابردوویەکێ تال یێ پڕ ژ شاشی بۆ عیراقێ ب جهـ هێلا. د ڤێ ڕۆژێدا دووپات دکەینەڤە کو حکومەتا فیدرالی یا عیراقێ دڤێت كارێ خۆ بجهبینیت و ل دووڤ بڕیارا دادگەها بلندا تاوانێن عیراقێ کو ئەڤ تاوانە ب جینۆساید ناساندیە، قەرەبوویا ماددی و مەعنەوی یا قوربانییان و زیانلێکەفتییان بکەت و ڕەگەزنامە و مولك و مالێن وان بۆ بزڤڕینیتەڤە.
خەبات، دلسۆزی و قوربانیدانا خویشك و برایێن کوردێن فەیلی بۆ هەموو دەمان جهێ شانازییا گەلێ مەیە. دڤێت ئەو ڕابردوویێ تال بۆ مە هەموویان ببیتە پەند و وانە داکو بۆ پاشەڕۆژەکا باشتر ل سەر بنەمایێ پێکڤەژیان و ئێکدو قەبوولکرنێ ل عیراقێ مفا لێ وەربگرین، بۆ ڤێ مەرەمێ ژی دێ بەردەوام د بزاڤێن خۆ دا بین و كا چ یا پێدڤی بیت دێ د هاریکار بین.
