بارەگەھێ بارزانی ل دۆر زمانێ زڤر و جینودانێ د راگەھاندنێ دا بەیانەک بەلاڤ کر و راگەھاند، ب مخابنی ڤە دەمەکە جینودان و زمانێ زڤر د ناڤبەرا ئالیێن سیاسی دا دروست بوویە، ژبۆ وێ یەکێ ژی سەرۆک بارزانی فەرمان ب راگەھاندنا پارتی کرییە کو پێدڤیە بەھا و پرەنسیپ و بنەمایێن رەوشت بلندیێ ل بەرچاڤ بھێنە وەرگرتن. بارەگەھێ بارزانی د دبەیانا خوەدا ئاماژە ب مەرجەعییەتا کوردان دا و راگەھاند، ب ھزرا سەرۆک بارزانی خوینا شەھیدان و سەنگەرێن پێشمەرگەی مەرجەعن بۆ ھەموو خودان دۆز و نشتیمانپەروەر و وەلاتپارێزێن کوردستانێ. بارەگەھێ بارزانی ئاشکرا ژی کر، ل گۆرەی فەرمانا بارزانی ھەر ئۆرگانەکێ پارتی پێگیریێ ب بەھا و ئارمانجێن پارتی و پرەنسیپێن گشتی نەکەت دێ لێپرسین د گەل دا ھێتە کرن. د بەیانا بارەگەھێ بارزانی دا ھاتیە، سەرۆک بارزانی پیشتر و نھا و ل پاشەرۆژێ ژی ھەر خوە ب پێشمەرگە دزانیت و پێشمەرگایەتی ل سەرێ ھەموو پێناسە و پلە پۆستان دھێت و ب مەزنترین شانازی ژی دزانیت.
