سەرۆک بارزانی پێشوازی ل بالیۆزێ بریتانیا ل ئیراقێ کر و پرۆسا سیاسییا ئیراقێ و پەیوەندیێن ھەولێرێ و بەغدا گۆتوبیژ کرن.
سەرۆک مەسعوود بارزانی ئەڤرۆ د گەل ستیڤن ھیکی کۆم بوو و بالیۆزێ بریتانیا راگەھاند، بریتانیا و ھەڤپەیمان ل سەر پاراستنا ھەرێما کوردستانێ رژدن و ھێرشا داویێ یا ل سەر فرۆکخانەیا ناڤدەولەتییا ھەولێرێ شەرمزار کر.
ل گۆرەی راگەھاندنەکا بارەگەھێ بارزانی، ستیڤن ھیکی، بالیۆزێ بریتانیا ل بەغدا ب سەرۆک بارزانی راگەھاندیە، سەقامگیری و ئارامییا ھەرێما کوردستانێ ب فاکتەرەکێ سەرەکی بۆ سەقامگیری و ئارامییا ئیراقێ و دەڤەرێ دزانن.
سەرۆک بارزانی و ستیڤن ھیکی تیشک خستە سەر پرۆسا چاکسازیێ ل وەزارەتا پێشمەرگەی و بالیۆزێ بریتانیا پشتەڤانییا وەلاتێ خوە بۆ سەرخستنا چاکسازیێ و کاراکرنا ھێزێن پێشمەرگەی دوپات کر.
