دەمێ ئازادی دبیتە بەهانە… سنوردانان دبیتە پێدڤی!

هەرێما کوردستانێ د قوناغەکا هەستیار و رووی ب روویی هێرش و گەفێن جوراوجور دایە، خەلک ل ژێر بارودۆخەکێ گراندا دژیت، ل شوینا قوربانیدان و رێتنا خوینا لاوێن مە ببیتە هەستێ هەڤبەش و ب بەرپرسیارییەتەکا نەتەوەیی بهێتە گوهۆرین هندەک میدیا و میدیاکار دور ژ بنەما و ئەخلاقییاتێن کارێ راگەهاندنە، ئەڤ بارودوخە بۆ خۆ دەلیڤە دیتی یە و دکەنە دخزمەتا پرۆژە و پلان و پیلانێن خۆ یێن بەرتەنگێن کەسوکی و حزبیدا. ئەڤ جورە رەوشە پێدڤی ب ویژدانەکا زندی هەیە کو بشێین دگەل ئازارێن خەلکی هەڤبەشبین، هەرچەندە ئەڤە ب هەمیان ناهێتە کرن، بەلێ هەر چ نەبێت ب کێمی دڤێت ببیتە بنەمایێ رەفتارێن مە.
ئەم دڤی دەمیدا حەز ناکەین بچینە دناڤ جەدەلا بەرسڤدان و گوتارێن توندوتیژدا، چونکی پاراستنا ئارامییا دەروونێ جڤاکی و هەستکرن ب بارودوخێ خەلکی ل هەر تشتەکێ گرنگترە. بەلێ ئەڤە نابیتە بهانە بو وێ چەندێ هندەک میدیا، ب تایبەتی ئەو کەنالێن لسەر بنەمایێ دەستکرد و بێ پابەندییا ئەخلاقی کار دکەن، سنورێن پیشەیی و نیشتیمانی دەرباز دکەن و رەمز و پیرۆزییێن جڤاکی بئێخنە دناڤ بازارێ بانگەشە و خۆ دەرئێخستنێ.
ئازادییا راگەهاندنێ ب رامانا بێ سنوورییێ نینە، بەلکی گرێداییە ب بەرپرسیارییەتێ. هەر میدیایەکا ڤێ هەڤکێشێ تێنەگەهیت، ژ روویێ ئەکادیمی و پیشەییڤە دێ چیتە دەرڤەیی چوارچوڤەیێ راگەهاندنا راستەقینە.
ژبەر وێ چەندێ، بانگەوازیا ڕاستەوخۆ ئاراستەیی وان لایەن و کەسان یێن پشتەڤانیا دارایی و سیاسی یا بۆ ڤان جورە پلاتفورمان دابین دکەن؛ پێدڤییە ب شێوەیەکێ هشیار دخۆدا بچنەڤە و هەست ب بەر پرسیارییەتا خۆ بکەن، راوەستیانا ڤان ئاراستەیان بکەن بەری ب شێوەیەکێ فەرمی و نە چارکری بهێنە راوەستاندن.