مه‌سروور بارزانى: په‌سه‌ندكرنا قانوونا تاوانێن داعشێ گاڤه‌كه‌ ب ئاراستەیا سزادانا تاوانباران

مه‌سروور بارزانی، سه‌رۆكێ حكومه‌تا هه‌رێما كوردستانێ په‌یامه‌ك ب هه‌لكه‌فتا په‌سه‌ندكرنا پڕۆژه ‌یاسایا دادگه‌ها تاوانکارییا تایبەتمەند ب تاوانێن داعشێ ل هەرێما کوردستانێ راگه‌هاند و دووپاتكر، ئه‌و یاسا دێ بیته‌ گاڤه‌ك ب ئاراستەیا سزادانا تاوانباران و ئینانا دادپەروەرییا زێده‌تر.

ده‌قێ په‌یاما مه‌سروور بارزانی:

جڤاتا وەزیران، ئه‌ڤرۆ پرۆژه‌ قانوونا دادگه‌ها تاوانکارییا تایبەتمەند ب تاوانێن داعشێ ڤه‌ ل هەرێما کوردستانێ په‌سه‌ند كر، ب مه‌رما لێپرسینێ و دادگه‌هكرنا تیرۆرستێن داعشێ ل سەر تاوانین شه‌رى و تاوانێن دژى مرۆڤایەتی و كۆمكوژیێ.

ئەڤ یاسایە پشتى په‌سه‌ندكرنێ ژ لایێ په‌رله‌مانێ كوردستانێ ڤه، كڤانێ یاسایی بۆ دادگه‌هکرنا تیرۆرستێن داعشێ دێ هێته‌ دارێژتن، ب رێیا پێکئینانا دادگه‌هه‌كا نشتیمانى ل هەرێما کوردستانێ، ب پكشدارییا تیمێ ڤه‌كۆلینا ناڤدەولەتی بۆ لێپرسینێ ژ تاوانێن داعشێ یونیتاد كو دێ هه‌ڤكار بیت ژ روویێ کۆمکرنا بەلگەیان .

بێگومان ئەڤە برینێن كوور یێن‌ قوربانیێن ده‌ستێ داعشێ سارێژ ناکه‌ت، ب تایبەتی خووشك و برایێن ئێزیدی و قوربانیێن دیتر، بەلێ دێ بیته‌ گاڤه‌ك ب ئاراستەیا سزادانا تاونباران و ئینانا دادپەروەرییا زێده‌تر.

حکومەتا هەرێما کوردستانێ و حکومەتا فیدرالی و جڤاكێ ناڤدەولەتی، ئەرکێ سەر ملێن وانه‌‌ تیرۆرستێن داعشێ رووبروو دادگه‌هێ بکەن ل بەرامبەر تاوانێن وان ل دژى گەلێ کوردستانێ و خەلكی ئیراقێ و مرۆڤایەتیێ ب گشتی، ئەڤرۆ دێ بزاڤی كه‌ن بۆ ب ‌جێگه‌هاندنا ڤى ئه‌ركێ  هه‌ڤپشك، ژ پێخه‌مه‌ت قوربانیێن ئێراق و جیهانێ، بێگومان ئه‌ڤێ كاره‌كێ زۆر دڤێت، بەلی ل داویێ دێ هه‌ر هێته‌ جهـ.