سوپایێ ئیراقێ: مە رێککەفتن د گەل تورکیا نینن

فەرماندارییا ئۆپەراسیۆنێن ھەڤپشک یێن ئیراقی راگەھاند، ئەوان چ رێککەفتن د گەل تورکیا دا نینن کو چالاکیێن سەربازی د ناڤا سنۆرێن ئیراقێ دا بکەن.
لیوا تەحسین خەفاجی، پەیڤدارێ فەرماندارییا ئۆپەراسیۆنین ھەڤپشک یێن ئیراقی د پرێسکۆنفرانسەکی دا راگەھاند، ئەو نەشێن رازی بن و د گەل تورکیا رێکبکەڤن کو سوپایێ تورکیا ناڤا سنۆرێن ئیراقێ بۆمبەباران بکەت و ئەو دەنگۆیێن بەحس ل رێککەفتنێ دکەن دوورن ژ راستیێ.
خەفاجی گۆت ژی: ئەوان ھەماھەنگی و پەیوەندی د گەل ھەرێما کوردستانێ ھەنە بۆ وێ یەکێ ئەگەرێن ئۆپەراسیۆنێن ئێک ل دووڤ ئێک یێن سوپایێ تورکیا بزانن، رۆژانە ژی حکومەتا فیدرال و وەزارەتا دەرڤە کار ل سەر وێ یەکێ دکەن.
ل دۆر ھەماھەنگییا د گەل ھێزێن پێشمەرگەیێن کوردستانێ ژی خەفاجی گۆت: ئەوان نیاز ھەنە د گەل ھێزێن پاسەوانێن ھەرێما کوردستانێ کارێ ھەڤپشک بکەن، حکومەتا ھەرێمێ و یا فیدرال دوپاتیێ ل کارێ ھەڤپشک دکەن بۆ وێ یەکێ ڤالاتیێن ئێمناھیێ پڕ بکەن.
پێشتر ڤۆلکان بۆزکیر، سەرۆکێ جڤاتا گشتییا نەتەوەێن ئێکگرتی، کو دووەم بلندترین پۆستێ بلندێ نەتەوەیێن ئێکگرتی یە و دبلۆماتکارەکێ بەرنیاسێ تورکیایە راگەھاند بوو، ئۆپەراسیۆن دژی پەکەکێ ب ھەماھەنگی دگەل حکومەتا ئیراقێ دھێنە کرن و گۆت بوو: تورکیا پەیوەندییەکا دۆستانە ل گەل ئیراقێ و ھەرێما کوردستانێ ھەیە و دانوستاندن د گەل دا بەردەوامن و ئۆپەراسیۆنێن وان ب تاکە لایەنی ناھێنە کرن.