چاویشئوغلۆ: پێدڤییه‌ كه‌مپا مه‌خموور ژ په‌كه‌كێ بهێته‌ پاقژكرن

وه‌زیرێ ده‌رڤه‌ یێ توركیا راگه‌هاند؛ كه‌مپا مه‌خموور كه‌مپا تیرۆرێ یه‌ و داخواز ژ حكومه‌تا ئیراقێ كر هه‌ماهه‌نگییێ دگه‌ل توركیا بكه‌ت بۆ پاقژكرنا وێ.

مه‌ولوود چاویشئوغلۆ، وه‌زیرێ ده‌رڤه‌ یێ توركیا د پرۆگرامه‌كێ ته‌له‌ڤزیۆنى دا راگه‌هاند؛ كه‌مپا مه‌خموور جهێ تیرۆرێ یه‌ و لاندكا پێگه‌هاندنا په‌كه‌كێ یه‌ و پێدڤییه‌ بهێته‌ پاقژكرن.

دیار ژى كر، ئه‌و د بابه‌تێ سڤیلان دا گه‌له‌ك د هه‌ستیارن لێ كۆمه‌لگه‌ها ناڤده‌وله‌تى دبینیت ئه‌و جهێ تیرۆرێ یه‌.

چاویشئوغلۆ ئاماژه‌ ب وی یه‌كێ ژى كركو توركیا گرنگییێ ب سه‌قامگیرى و ئاسایشا ئیراقێ دده‌ت و رێزێ ل سه‌روه‌رییا ئیراقێ دگریت، وان دڤێت دگه‌ل ئیراقێ كاربكه‌ن و بژاردا وان پاقژكرنا چیایێ قه‌ندیل و چیایێ شنگال و كه‌مپا مه‌خمووره‌.

كه‌مپا مه‌خموور یا تایبه‌ته‌ ب ئاواره‌یێن باكورێ كوردستانێ ڤه‌ و توركیا دبێژیت بوویه‌ لاندكا پێگه‌هاندنا په‌كه‌كێ و تا نها چه‌ندین جاران توركیا بۆمبه‌باران كرییه‌.