جێگرێ سەرۆک وەزیرێن هەرێما بادێن – ڤۆرتێمبێرگ پێشوازی ل پارێزگارێ دهۆکێ کر

 دبەردەوامیا سەرەدانا خوه‌ دا بۆ کۆمارا ئەلمانیا فیدرالی  دکتور “عەلی تەتەر” پارێزگارێ دهۆکێ ل شتوتگارتێ ژلایێ بەرێز “فلۆریان هاسلەر” Florian Hassler جێگرێ سەرۆک وەزیرێن هەرێما بادێن – ڤۆرتێمبێرگ و وەزیرێ ئێکێ هاتە پێشوازیکرن. 

درۆنشتنەکێدا پشتی بخێرهاتن و سۆپاسیێ باس ل رەوشا دەڤەرێ و دووماهی پێشڤەچوونان دبیاڤێن جۆدا داکر و ل دۆر دەستە خۆشکیا پارێزگەها دهۆکێ و پارێزگەها شتوتگارت پایتەختێ هەرێما بادێن – ڤۆرتمبێرگ، بەرێز هاسلەر دۆپاتکر دحکۆمەتا نوو یا کۆمارا ئەلمانیا فیدرال دا ئەڤ دەستە خۆشکیە دێ یا بەردەوام بیت و وان ئۆفیسەک بناڤێ کارۆبارێن دگەل پارێزگەها دهۆکێ دامەزراندییە. 
پارێزگارێ دهۆکێ سۆپاسیا بەرێز هاسلەر و پەرلەمان و حکۆمەتا هەرێما بادێن – ڤورتمبێرگێ بۆ هەماهەنگی و هەڤکارییا بەردەوام و خۆشحالیا خوه‌ ب بەردەوامییا دەستە خۆشکیا دگەل پارێزگەها دهۆکێ دحکومەتا نوو دا دوپاتکر و لۆگویێ رێزلێنانێ یێ پارێزگەها دهۆکێ پێشکێشی ناڤبری کر.