لژنا بلند یا به‌رهنگاربوونا كۆرۆنایێ ل هه‌رێمێ 14 بریارێن نوو ده‌رخستن

به‌ری ده‌مه‌كێ کۆمبوونا لژنا بلند یا بەرهنگاربوونا کۆرۆنایێ ب دووماهی هات و جۆتیار عادل، پەیڤدارێ حکومەتا هەرێمێ د کۆنگرەکێ رۆژنامەڤانی دا بریارێن لژنێ راگەهاندن، كو ژ 14 خالان پێك دهێن:

. پێدڤییە ئه‌و کەسێن ل جهێن ئایینی و بازاران و مۆل و جهێن گشتی و هۆتێل و مۆتێلان کار دکەن، ڤاکسینێ بدانن یان بەردەوام تێستا 72 دەمژمێری هەبیت و لژنێن قایمقامیان دێ دووڤچوونێ کەن و ئه‌و جهێن پێگیر نەبن دێ هێنە داخستن.
. پێدڤیە هەموو فەرمانبەر ڤاکسینێ وەربگرن و ب ماسک بچنە دەوامێ، یێ بجهـ نەئینیت، دێ ل دووڤ قانوونا فەرمانبەران هێتە سزادان و لژنا بلندا بەرهنگاربوونا کۆرۆنایێ دێ هەلسەنگاندنێ بۆ بجهئینانا ڤێ خالێ کەت.
. رێك ناهێتە دان گەشتیارێن بێی ڤاکسین یان تێستا 48 دەمژمێری سەرەدانا هەرێما کوردستانێ بکەن.
. هەر کۆمپانیەکا گەشتیاری یا تێستێن سەختە بکار بینیت، دێ ل هەرێما کوردستانێ هێتە قەدەغەکرن و دێ چیتە د لیستا رەش دا.
. سەپاندنا گرێدانا ماسکی ل جهێن گشتی و فەرمانگەهێن میری بۆ وان کەسێن ڤاکسین دانای ژی.
. چوونا سەر گۆران و کۆر و کۆنفرانس ب هەموو رەنگان قەدەغەیە و یێ پێگیر نەبیت، دێ هێتە سزادان، ل گۆرەی سزایێن بەری نوکە هاتینە دەستنیشانکرن.
.مەلەڤانگەهـ و جهێن وەرزشی ب مەرجێ بجهئینانا رێنمایان دێ ڤەکری بن.
. هۆلێن سینەمایێ د ناڤ مۆل و بازار و جهێن گشتی دا دێ دگرتی بن.
. هۆلێن شەهیانان و هۆلێن هەلکەفتان ل ناڤ هۆتێلان دێ دگرتی بن.
. دانانا تازیان ب هەموو رەنگان قەدەغەیە و یێ پێگیر نەبیت دێ هێتە سزادان.
. جهێن ئایینی ب بجهئینانا رێنمایان دێ ڤەکری بن و یێ پێگیر نەبیت دێ رێکار بەرامبەر هێنە وەرگرتن.
. ژوورێن ئۆپەراسیۆنان ل پارێزگەهان دێ ڤان رێکاران بجهـ ئینن و دەستهەلات هەیە” هه‌كه‌ پێدڤی بیت رێکاران دژوارتر بکەن.
. لژنا بلند یا بەرهنگاربوونا کۆرۆنایێ داخواز ژ دەزگەهێن میدیایی دکەت هاریکار بن و هشیاریێ بەلاڤ بکەن و سوپاسیا وان دکەت یێن کو تا نوکە دهاریکارن.
. ئەڤ رێکارە بۆ دەمێ حەفتیەکێ نە و لژنا بلند یا بەرهنگاربوونا کۆرۆنایێ دێ ل رۆژا 3/8/2021 کۆم بیتە ڤە و دێ هەلسەنگاندنێ بۆ ڤان رێکاران کەت.