ب هه‌لكه‌فتا وه‌غه‌ركرنا پرۆفیسۆر نادر نادرۆڤ، نڤیسه‌ر و ڤه‌كۆله‌رێ زانستی و نه‌ته‌وه‌یی یێ كوردێ كازاخستانێ، سه‌رۆك مه‌سعود بارزانی په‌یامه‌كا سه‌ره‌خۆشیێ به‌لاڤكر.
ئەڤرۆ سێشەمبی 24-8-2021 نادر نادرۆڤ یێ ناسیار ب “مارشالێ نەفت و گازێ” د ژیێ 89 سالییێ دا ل نەخۆشخانا باژێرێ ئەلماتا یا کازاخستانێ وه‌غه‌ر كر.
دەقێ پەیاما سەرۆک بارزانی ب هه‌لكه‌فتا وه‌غه‌ركرنا نادر نادرۆڤی:
ب ناڤێ خودایێ بەخشندە و میهرەبان
ب داخه‌كا زۆرڤە من نووچه‌یێ وه‌غه‌ركرنا كەسایەتیێ زانستی و نەتەوەیی و جەماوەری یێ كوردێن كازاخستانێ پڕۆفیسۆر (نادر نادرۆڤ) بهیست.
نادر نادرۆڤ زانایێ ناڤدارێ كورد و خودانێ ب دەهان كتێب و سەدان ڤه‌كۆلینێن زانستی بوو” رۆله‌كێ كاریگەر د یەكخستن و سەرپەرشتییا كاروبارێن كوردێن كازاخستانێ و وه‌لاتێن سۆڤییەتا به‌رێ دا هەبوو و ژ دەستدانا وی خۆسارەتییه‌كا مه‌زنه.
پرسە و سەرەخۆشیێن خوه ئاراستەی خێزان و كەسوكار و ناڤەندێن ئه‌كادیمی و جەماوەری یێن كوردێن كازاخستانێ و هه‌موو كوردێن وه‌لاتێن سۆڤییەتا به‌رێ دكەم و خوه ب هه‌ڤبەشێ خەما وان دزانم.
ژ خودایێ مەزن دخوازم رۆحا خودێ ژێ رازی نادر نادرۆڤی ب بەهەشتا بەرین شاد بكه‌ت و سەبر و ئارامیێ بده‌ته هەموو لایەكی.
