فره‌نسا: هێزێن مه‌ سه‌ركرده‌كێ داعشێ ل بیابانێن مه‌زن كوشتن

سه‌رۆكێ فره‌نسا د تویته‌كێ دا راگه‌هاند؛ هێزێن وان سه‌ركرده‌یێ تیرۆریستێن داعشێ ل بیابانێن مه‌زن كوشتن.

ئیمانوێل ماكرۆن د تویته‌كێ دا راگه‌هاند؛ عه‌دنان ئه‌بو وه‌لید ئه‌لسه‌حراوی، سه‌ركرده‌كێ تیرۆریستێن داعشێ ل بیابانێن مه‌زن ژ ئالییێ هێزێن فره‌نسی ڤه‌ هاتییه‌ كوشتن، ئه‌ڤه‌ ژی بۆ وان ده‌سكه‌فته‌كا دی یا مه‌زنه‌ د شه‌ڕێ تیرۆرێ دا.

ماكرۆنی دوپات ژی كر، دێ دگه‌ل هه‌ڤپشكێن ئه‌فریقی، ئه‌وروپی و ئه‌مریكییان به‌رده‌وام بن د شه‌ڕێ تیرۆرێ دا.

ده‌وله‌تا ئیسلامی ل بیابانا مه‌زن لقه‌كا رێكخستنا تیرۆری یا داعشێ یه‌، ل سالا 2015 ژ ئالییێ عه‌دنان ئه‌بو وه‌لید ئه‌لسه‌حراوی هاتییه‌ دامه‌زراندن و ژ وه‌لاتێن مالی، چاد، نیجیریا، بۆركینافاسۆ و مۆریتانیا شه‌ڕی تێدا دكه‌ن.