ژماره‌كا كه‌ساتییێن عه‌ره‌ب رۆژا ئه‌ینیێ ل باژارێ هه‌ولێرێ كۆمبوونه‌ك كربوو و د ناڤا كۆمبوونێ دا پشته‌ڤانیا خوه بۆ په‌یوه‌ندیێن فه‌رمی یێن ئیراقێ ل گه‌ل ئیسرائیلێ دیاركرن.
نووچه‌یێ پشته‌ڤانییا په‌یوه‌ندیێن ئیراقێ ل گه‌ل ئیسرائیلێ هه‌ر زوو گه‌هشت مه‌دیایێن ئیسرائیلێ، هه‌ر د وێ رۆژێ دا وه‌زیرێ ده‌رڤه یێ ئیسرائیلێ ل سه‌ر وی بابه‌تی هاته ده‌نگ و گۆت: ئه‌و روودانه ژێده‌ره‌كێ ب هیڤی و گه‌شبینه ژ بۆ باشتركرنا په‌یوه‌ندیێن ئاشتییانه یێن ئیسرائیلێ ل گه‌ل جیهانێ.
كێمتر ژ 24 ده‌مژمێراندا، حكومه‌ت و سه‌ركردێن دیارێن ئیراقێ ل دژی وێ كۆمبوونێ هاتنه ده‌نگ، حكومه‌تا هه‌رێما كوردستانێ ژی رۆهنكرنه‌ك ل دۆر وی بابه‌تی دا و راگه‌هاند؛ كۆمبوون بێ ره‌زامه‌ندی و ئاگه‌هدارییا وان هاتییه كرن و دێ دووڤچوونێ بۆ كه‌ن.
نڤێسینگه‌ها راگه‌هاندنا سه‌رۆكوه‌زیرێن ئیراقێ كۆمبوون ب نه‌قانوونی ب ناڤكر و گۆت: حكومه‌تا ئیراقێ ب هه‌موو شێوه‌كی وێ كۆمبوونێ ره‌ت دكه‌ت كو هنده‌ك كه‌ساتیێن هۆزێن ل هه‌ولێرێ د ئاكنجی ئه‌و كۆمبوونه كرینه و دروشمێن ئاساییكرنێ ل گه‌ل ئیسرائیلێ بلندكرینه.
هه‌ر د راگه‌هاندنێدا دوپات كرییه، چه‌مكێ ئاساییكرنا په‌یوه‌ندییان ژ روویێ ده‌ستوور، یاسا و سیاسی ره‌ت دكه‌ن و د راگه‌هاندنێ دا هاتییه؛ حكومه‌تا ئیراقێ ب رۆهنی هه‌لوه‌ستێ دیرۆكی یێ خوه یێ نه‌گۆر ده‌ربڕی یه، كو پشته‌ڤانییا ره‌وشا دادپه‌روه‌رانه یا فله‌ستین و به‌رگریكرن ژ گه‌لێ فله‌ستینێ دكه‌ن.
وه‌زاره‌تا ناڤخۆ یا هه‌رێما كوردستانێ رۆژا شه‌مبیێ رۆهنكرنه‌ك ل دۆر كۆمبوونێ به‌لاڤكر و تێدا هاتییه، كۆمبوون بێ ئاگه‌هداریی و ره‌زامه‌ندیی و پشكداریكرنا حكومه‌تا هه‌رێما كوردستانێ هاتییه كرن، هه‌روه‌ها ب چ شێوه ده‌ربڕینێ ژ هه‌لوه‌ستێ حكومه‌تا هه‌رێمێ ناكه‌ت و رێكارێن پێدڤی بۆ دووڤچوون ل دۆر چه‌وانییا سازكرنا ڤێ كۆمبوونێ دێ هێنه لبه‌رگرتن.
