پارتی ل سه‌ر ئاستێ عێراقێ حزبا ئێكێ یه‌

ل گه‌ل راگه‌هاندنا ئه‌نجامێن به‌راهیێ 100% ده‌نگ هاتنه‌ ژێك جوداكرن، ده‌ركه‌فت پارتى دیموكراتى كوردستان ل سه‌ر ئاستێ عیراقێ یا ئێكێ یه‌ و 782 هزار و 578 ده‌نگ ب ده‌ستڤه‌ئینان و خودان 33 كورسیێن په‌رله‌مانى یه‌ د خولا داهاتییا جڤاتا نوونه‌رێن عیراقێ.

ب ڤى شێوه‌ى پارتى دێ بیته‌ مه‌زنترین حزب ل سه‌ر ئاستێ عیراقێ، كو ب تنێ و بێى پێكئینانا هه‌ڤپه‌یمانییا پێشوه‌خت،شیا ئه‌وان ژمارا كورسییان ب ده‌ستڤه‌ بینیت.

لیستا موقته‌دا سه‌در رێبه‌رێ ره‌وتا سه‌در، شیا 73 كورسیێن په‌رله‌مانى مسۆگه‌ر بكه‌ت و مه‌زنترین كوتله‌یه‌، به‌لێ د چوارچووڤێ حیزبێ دا نینه‌، به‌لكو هه‌ڤپه‌یمانییه.

هه‌ر ئێك‌ ژ ته‌قه‌دوم یا محه‌مه‌د حه‌لبووسی و ده‌وڵه‌تا یاسایا نووری مالیكی خودان 37 كورسینه‌، به‌لێ چ ژ وان د چوارچووڤێ حزبێ دا نینه‌ و وه‌كى هه‌ڤپه‌یمانییه‌كا به‌رفره‌هـ چووینه‌ دناڤ هه‌لبژارتنان دا.

‌به‌رى ئه‌نجام دانا هه‌لبژارتنان ژى د راپرسینه‌كێ دا، كو ل سه‌ر ئاستێ عیراقێ هاتییه‌ ئه‌نجام دان، دیاربوو ژلایێ ژمارا كورسیێن پارتى وه‌ك حزبا ئێكێ ل سه‌ر ئاستێ عیراقێ دێ مینیت.

‌راپرسین ژلایێ سه‌نته‌رێ به‌یان یێ ڤه‌كولینان و پلانان هاتبوو ئه‌نجام دان، كو سه‌نته‌ره‌كێ بێلایه‌نه‌ و ئۆفیسا وێ یا سه‌ره‌كى ل به‌غدایه‌.