رێژەکا مه‌زن یا خەلکی دێ گەشتێ بۆ دەرڤەی وەلاتی ئەنجام دەن

سالانە ل گەل نێزیکبوونا سالا نوو پشکەک ژ خەلکی بۆ بوراندنا بهێنڤەدانا سەرێ سالێ گەشتێ بۆ وەلاتێن دەرڤە ئه‌نجام دده‌ن.

ئەحمەد خۆرشید ژ کومپانیەکا گەشتیاری و ڤەگۆهاستنێ ل دهۆكێ بۆ ئاژانسا خانی راگەهاند: جۆدا ژ سالێن بوری ئەڤ سالە هژمارەکا مه‌زنتر یا خەلکێ پارێزگەها دهۆکێ دێ سەرەدانا وەلاتێن دەوروبەر کەن ژبۆ بوراندنا بهێنڤەدانا سەرێ سالێ.

 ناڤهاتی گوت ژی: جۆدا ژ سالێن بوری خەلکی دڤێت ئەو ب تنێ گەشتێ بکەن نەکو ل گەل گرۆپێن کۆمپانییان ئەڤە ژی وێ چەندێ دگەهینیت کو هشیارییه‌كا گەشتیاری ل دەف خەلکی پەیدابوویە.

ئه‌و چه‌ند ژی دیار کر: پرانییا وی خەلکێ کو گەشتێ دکەن دێ بەرەف وەلاتێ تورکیاڤە چن و ئەگەرێ وێ ژی ژبەر نێزیکی و داکەفتنا لیرێ تورکییه‌ ل ڤان دووماهییان کو وێ ژی هه‌تا رادەکێ کاریگەریا خوە هەیه‌.

ل داویێ ئاشكرا كر ژی: د نوکەدا هەمی تکێتێن فرۆکخانا شەرنەخێ بۆ هەردو فرۆکخانێن ئیستەنبۆلێ هاتینە فرۆتن، ئەگەر کەسەکێ بڤێت گەشتێ بکەت دڤێت یان ب بهایەکێ گرانتر پلێتێ بکریت یان ژی ب ترۆمبێلان گەشتێ بکەت.