په‌یڤدارێ پارتی دیموکراتی کوردستان راگەهاند، مه ل گەل ئێكه‌تییێ پڕۆژەك ئامادە کرییە و مه دڤێت بكه‌ینه کارنامەكێ کوردستانی، بۆ هندێ ل گوتۆبێژان ل گه‌ل لایەنان ل بەغدا به‌رچاڤ بكه‌ین و ئاشکرا کر، ئێکلاکرنا پۆستان د کۆمبوونێن مەکتەبا سیاسییا پارتی و ئێكه‌تییێ دێ بریار ل سەر هێته دان.
مەحموود محەمەد، د کۆنفرانسه‌كێ رۆژنامەڤانیدا، دیار كر: “هاتنا شاندێ رەوتێ سەدری پەیوەندی ب هندێ ڤه هەیە، كو بریارە ل رۆژ 9/1/2022 ئێکەم کۆمبوونا خولا پێنجێ یا جڤاتا نوونەرێن عێراقێ بهێته كرن، هەروەسا پێشتر هنده‌ك لێک تێگەهشتن دناڤبه‌را مه دا هەبوویە، ده‌ربارەی چاوانییا پێکئینانا حکومەتا نوو یا عێراقێ” پێدڤییە دناڤا خوه ژی دا ل کوردستانێ گوتۆبێژان بکەین، بۆ ڤێ مه‌ره‌مێ سوبەهی دێ شاندێ مه ل گەل یێ ئێكه‌تییێ کۆم بیت.
ئه‌و ژی گۆتییه: “کۆمبوونا سوبەهی یا پارتی و ئێكه‌تییێ، کۆمبوونا دو لژنا یه، ئێك ژ وان لژنان یا تایبەتە ب كارێ دانوستاندنان ل گەل بەغدا، هه‌روه‌سا ئێکلایی كرنا پۆستان پەیوەندی ب وان لژنان ڤه نینه یێن كو كۆم دبن” بەلکو پۆست دێ ل کۆمبوونێن مەکتەبا سیاسییا پارتی و ئێكه‌تییێ هێنه ئێکلایی كرن.
