نێچيرڤان بارزانى، سه‌رۆكێ هه‌رێما كوردستانێ ئه‌ڤرۆ ئێک شەمبی پێشوازى ل مارك برايسۆن ريچاردسۆن، باليۆزێ بريتانيا ل عیراقێ و شاندێ دگەل داکر.
ل گۆرەی راگەهاندنا سەرۆکاتیا هەرێما کوردستانێ، دوماهیک پێشهاتێن رەۆشا سیاسی و پرۆسا هەلبژارتنێن دەستەیا سەرۆکایەتیا پەرلەمانێ عیراقێ و گەنگەشەکرن لسەر لایەنان بۆ پێنگاڤا داهاتی یا پرۆسا سیاسی ، هەلبژارتنا سەرۆککۆماری و پێکئینانا حکۆمەت، پەیوەندیێن هەولێر و بەغدا و پەیوەندیێن بریتانیا دگەل عیراق و هەریما کوردستانێ گوتوبێژکرن.
نێچيرڤان بارزانى، سەرۆکێ هەرێما کوردستانێ دووپات ل گرنگی و پێدڤیا ئارامیا سیاسی ل عیراقێ و هەبوونا باوەریێ و تێگەهشتنا هەڤبەش یا لایەن و پێکهاتان بۆ برێڤەچوونا پرۆسا سیاسی د نوکە و داهاتیەکێ باشتر دا بۆ وەلاتیان کر.
د راگەهاندنێ دا ئاماژە کریە، هەردوو لا هەڤرا بوون ل سەر گرنگیا ئێک هەلویستی و ئێک رێزیا لایەنێن سیاسی یێن هەرێما کوردستانێ ل بەغدا و هیڤی خواست گوتوبێژ و بزاڤێن هێزێن سیاسی و لێکتێگەهشتنا هەڤپشك و ئارامیا سیاسی دگەل خودا بینیت، باس ل هندێ ژی کر کو دوستایەتیا لایەنان بگرنگ دبینن بۆ گوتوبێژکرنێ دگەل لایەنێن عیراقی.
مارك برايسۆن ريچاردسۆن، باليۆزێ بريتانيا ل عیراقێ پێگیربوونا وەلاتێ خوە بۆ کارکرنا بەردەوام دگەل عیراق و هەرێما کوردستانێ تەکەزکر و سوپاسیا رۆلێ نێچیرڤان بارزانی د پروسا چاکسازیا وەزارەتا پێشمەرگەی دا کر، هەڤدەم پالپشتیا وەلاتێ خوە بو رێکخستنا هێزێن پێشمەرگەی دیارکر.
