سه‌رۆكێ هه‌رێما كوردستانێ پێشوازى ل وه‌زیرێ داد یێ لوبنانێ و شاندێ دگه‌ل دا كر.
ئه‌ڤرۆ نێچیرڤان بارزانى، سه‌رۆكێ هه‌رێما كوردستانێ پێشوازى ل دادوه‌ر هنرى خورى، وه‌زیرێ لوبنانێ و شاندێ دگه‌ل دا كر کو پێکهاتبوون ژ سه‌رۆكێ جڤاتا داوه‌رى یا لوبنانێ، هاریكارێ ئه‌میندارێ گشتى یێ كومكارا عه‌ره‌بى و هژمارەكا شیره‌تكاران، مەرەم ژسەرەدانا شاندێ لوبنان بۆ هەرێما کوردستانێ و عیراقێ ب هەلکەفتا بیره‌وه‌رییا روژا دادوه‌رییا عیراقێ بۆ.
ددیدارێ دا وه‌زیرێ داد یێ هه‌رێما كوردستانێ ئاماده‌بوو به‌حس ل سیسته‌م و ره‌وشا ده‌ستهه‌لاتا دادوه‌رى و دادگه‌هان و بوارێ هاریكاریا دناڤبه‌را ده‌ستهه‌لاتا دادوه‌رى یا لوبنان و عیراقێ و مفا وه‌رگرتن ژ ئه‌زموونێن ئێك هاته‌كرن. هه‌روه‌سا دوپاتى ل گرنگییا سه‌ربه‌خۆیا ده‌ستهه‌لاتا دادوه‌رى هاته‌كرن و هه‌ردولا د هه‌ڤرابوون كۆ سه‌ربه‌خویا دادوه‌رى بنه‌مایێ ده‌وله‌تداریێ یه.
هه‌روه‌سا ئێك ژ ته‌وه‌رێن دى یێن گرنگ باس ل دوماهی پێشهاتێن ره‌وشا سیاسى و ئه‌منى ل عیراقێ و لوبنانێ بوو. ژ لایێ خوە ڤە شاندێ لوبنان شروڤەکاری دەربارەی بزاڤێن حکومەتا لبنانێ بۆ دەربازکرنا رەوشا دژوار یا ئابووری و قەیرانان ل وەلاتێ خوە بەرچاڤکرن، باس ل دەستپێشخەریەکا کومکارا عەرەبی بۆ پشتەڤانیا دەستهەلاتا دادوەریا لبنانێ د رەوشا نوکە دا کر.
نێچیرڤان بارزانی سەرەدانا شاندێ لوبنانێ بۆ عیراق و هەرێما کوردستانێ گرنگ ل قەلەم دا و هیڤی خواست هاریکاریێن عیراق و هەرێما کوردستانێ دگەل لوبنانێ د بوارێ دادوەریێ دا زێدەتر بهێنە پێشڤەبرن و ئاماژە ب رۆلێ رەوەندا لوبنانی ل هەرێما کوردستانێ کر ب تایبەت ژی د بوارێ ئاڤەدانکرن و خزمەتگوزی و بانکی دا.
رەوشا ئاوارە و پەنابەران ل هەرێما کوردستانێ و لوبنانێ و چەند پرسێن دی جهێ گرنگی دانا هەڤپشک تەوەرەکێ دی یێ دیدارێ بوون.
