سه‌رۆكێ هه‌رێما كوردستانێ پێشوازى ل بالیۆزێ بریتانیا ل عیراقێ و شاندێ دگه‌لدا كر.
ئه‌ڤرۆ15/2/2022 نێچیرڤان بارزانى، سه‌رۆكێ هه‌رێما كوردستانێ پێشوازى ل مایك برایسۆن ریچاردسۆن، بالیۆزێ بریتانیا ل عیراقێ و شاندێ دگه‌ل دا كر.
د كۆمبوونێ دا پرۆسا سیاسى ل عیراقێ و هه‌لبژارتن و پێشهاتێن وێ و روینشتنا ئێكێ یا جڤاتا نوینه‌رێن عیراقێ و هه‌لبژارتنا ده‌سته‌یا سه‌رۆكاتییا په‌رله‌مانى و پرۆسا دیمۆكراسى یا عیراقێ هاتنه گۆتۆبێژكرن.
سه‌رۆك بارزانى دۆپاتى ل وێ یه‌كێ كر كۆ عیراق و هه‌رێما كوردستانێ پێدڤى ب ره‌وشه‌كا ئارامن ژبۆ وێ یه‌كێ بشێن به‌رنامێن خوه ب ره‌نگه‌كى بجهـبینن كۆ د به‌رژه‌وه‌ندییا هه‌موو پێكهاتێن عیراقێ دا بیت.
هه‌ردوو لایان دۆپاتى ژى ل خورتكرنا په‌یوه‌ندییێن عیراقێ و هه‌رێما كوردستانێ دگه‌ل بریتانیا كر و نوینه‌رێ بریتانیا ژى سۆپاسییا بزاڤێن سه‌رۆك نێچیرڤان بارزانى بۆ خورتكرنا په‌یوه‌ندییێن هه‌رێمی و عیراقێ دگه‌ل بریتانیا كر.
د ته‌وه‌ره‌كێ دى یێ كۆمبوونێ دا، ره‌وشا نافخۆ یا هه‌رێما كوردستانێ هاته به‌حسكرن و هه‌ردوولا تیشك ئێخستنه سه‌ر هه‌لبژارتنێن هه‌رێما كوردستانێ و پرۆسا نڤیسینا ده‌ستوورێ هه‌رێمێ.
ده‌رباره‌ى وێ یه‌كێ سه‌رۆك بارزانى دۆپاتكر هه‌رێما كوردستانێ یا پابه‌نده ب وێ یه‌كێ كۆ هه‌لبژارتن دده‌مێ خوه دا بهێنه‌كرن و پێدڤى یه ده‌ستوور ژی ب په‌سه‌ندا هه‌موو لایان بیت، و بۆ ڤێ مه‌ره‌مێ ژى پێدڤییه هه‌ماهه‌نگى دگه‌ل به‌غدا بهێته‌كرن.
