زه كۆنكێرور ( داگیركه‌ر)، ناڤێ فلمه‌كێ مێژوویى یه كۆ ل هۆلیوودێ هاتییه به‌رهه‌مئینان. زێده‌بارى كۆ تووشى ره‌خنه‌یێن مه‌زن بوو ژ لایێ خه‌لكى و ره‌خنه‌گران ڤه، ب مه‌زنترین كاره‌سات ژى ب دوماهى هات.
ل سالا 1956، ئه‌كته‌ر و ده رهێنه‌رێ هۆلیۆدێ (دیك بۆل) بریاردا فلمه‌كێ مێژوویى ل دور ژیانا شاهێ مه‌غولان جه‌نگیزخانى به‌رهه‌م بینیت. وى هه‌ردوو ئه‌كته‌رێن ب ناڤۆده‌نگ (جۆن واین) و (سوزان هایوارد) بۆ رولێ سه‌ره‌كى هه‌لبژارتن.
ده‌رهێنه‌رى ده‌ڤه‌را سانت جۆرج یا بیابانى ل ویلایه‌تا یۆتا یا ئه‌مریكا بۆ وێنه‌كرنا فلمى هه‌لبژارد كۆ كێمترى 220 كیلۆمه‌تران ژ خالا نیڤادا یا له‌شكه‌رى یا دویربوو. ل وى ده‌مى ئه‌و خالا له‌شكه‌رى مژویلى تاقیكرنه‌كا ئه‌تۆمى بوو بناڤێ (ئه‌ب شۆت نوسول). ئه‌و بایێ ژ جهێ وێ تاقیكرنێ به‌ر ب بیابانێ ڤه دهات یێ تژى بوو ژ تیشكێن ئه‌تۆمى.
هه‌رچه‌نده ده‌رهێنه‌ر یێ ئاگه‌هاداربوو ل سه‌ر وان تاقیكرنێن ئه‌تۆمى یێن ل وێ ده‌ڤه‌رێ دهاتنه‌كرن، لێ حكومه‌تێ ئه‌و پشت راستكر ژ سه‌لامه‌تییا وى جهى بۆ وێنه‌گرتنێ و بۆ ده‌مێ هه‌یڤه‌كێ ده‌ست ب وێنه‌گرتنا فلمى كر. پشتى وێنه‌گرتن ب دوماهى هاتى ل سالا 1956ێ ل هۆلێن سینه‌مایێ هاته نمایشكرن.
فلم تووشى ره‌خنێن دژوار بوو ژلایێ ره‌خنه‌گرێن سینه‌ماى ڤه، و بینه‌ران ژى هۆلێن سینه‌مایێ بجهێلان. پاشان بۆ خودانێ ناسناڤێ خراپترین فلم د مێژوویا هۆلیۆدێ دا.
لێ كاره‌ساتا مه‌زن ددوڤدا ده‌ستپێكر، سه‌رجه‌م گرۆپێ كارى تێبینییا هنده‌ك ئێشانێن به‌رده‌وام د له‌شێ خوه‌دا كر. پشتى بورینا حه‌فت سالان ژ وێنه‌گرتنێ، دیاربوو كۆ 91 كه‌س ژ وان تووشى نه‌خوه‌شییا په‌نجه‌شێرێ بووینه ژ ئه‌گه‌رێ ئه‌وێ ئاخێ كۆ یا تژى تیشكێن ئه‌تۆمى بوو.
ده‌رهێنه‌رێ فلمى ئێكه‌م كه‌س بوو كۆ تووشى په‌نجه‌شێرێ بووى و هه‌ر ب وى ئه‌گه‌رى ژى ژیانا خوه ژ ده‌ست دا. پاشان ئه‌كته‌ر (پێدرۆ ئه‌رمینداریز) ژى ل سالا 1963ێ تووش بوو و خوه ل به‌ر وێ چه‌ندێ نه‌گرت و هه‌ر ل وێ سالێ دوماهى ب ژیانا خوه ئینا. هه‌روه‌سا (جۆن واین) ئه‌كته‌رێ سه‌ره‌كى ژى تووشى په‌نجه‌شێرا سیهان بوو، پاشان دیاربوو كۆ تووشى په‌نجه‌شێرا ئاشكى ژى بوویه و ل سالا 1979ێ وه‌غه‌ركر. سوزان هایوارد ژى ل سالا 1975ێ ب په‌نجه‌شێرا سیهان وه‌غه‌ركر. ل سالا 1991ێ دوماهى كه‌س ژ گرۆپێ فلمى ب په‌نجه‌شێرێ ژیانا خوه ژده‌ست دا.
نه بتنێ گرۆپێ كارى تووشى نه‌خوه‌شییێ بوون، به‌لكو ئه‌وێن سه‌ره‌دانا وى جهى ژى كرین ل ده‌مێ وێنه‌گرتنێ تووشى په‌نجه‌شێرێ بوون. مایكل واین، برایێ بچیك یێ جۆن واینى ژى ب په‌نجه‌شێرا پیستى مر، و كۆرێ ئه‌كته‌را سه‌ره‌كى سوزان هایوارد ژى تووشى په‌نجه‌شێرا ده‌ڤى بوو.
