مهسعود بارزانى ب ههلكهفتا 31 سالیا سهرهلدانا گەلێ کوردستانێ پیرۆزباھیێن خوه ئاراستهى مالباتێن سەربلندێن شەھید و پێشمەرگەیێن قەھرەمان و وەلاتیێن کوردستانێ كر و دیاركر: سهرهلدان ھهلگرا بھا و وانەیهكا مەزن بوو، د سهرهلدانێدا گەلێ کوردستانێ، بھا و رەوشت بلندی و فهرههنگا خوە نیشا جیھانێ و دهڤهرێ دا و ب ھزاران لهشكهرێ رژێما بهعس کەتنه دەستێ وهلاتى و پێشمەرگەى دا، بەلێ ئێك کەس ژی نەھات ئازاردان و هاتنه سەرپشککرن کو بچنه دەرڤەیى وەلاتى یان ل کوردستانێ بمینن، یان ڤەگەرنە دناڤ حكومهتێ.
سهرۆك مهسعود بارزانى ئهڤرۆ د پهیامهكێدا راگههاند: سەرھلدان دژی دام و دەزگەھێن ستەمکار و داگیرکەرانه، پەیامەکا گەلەك روون بوو کو ژبلی ھەبوونا زۆلم و ستەمێ، خوازتا ئازادیخواز و رووبرووبوونا ستەمکاریێ ھەردەم د ناخێ مرۆڤێ کورد دا ھەبوو و دێ مینیت. شانازیەکا دى یا سهرهلدانێ ئێكرێزیا گەل و پێشمەرگە و ئالیێن سیاسی و پلان و دووربینیا سەرکردایەتیا سیاسیا کورد بوو. ئەڤ ئێكرێزیه بوو فاکتەرەکێ ب ھێز کو ل سەردەمهكێ ئالۆز و تاریدا سەرکەفتن و ئازادیێ مسۆگەر بكهت.
ههروهسا سەرۆك بارزانی گۆت: سهرهلدان بۆ گەلێ کورد دەرفەت بوو کو جیھان ژ ئێش و ئازارێن گەلێ کوردستانێ ئاگاھداربیت و ژ بۆ پاراستنا گەلێ کوردستانێ پێنگاڤێن كریارى هاڤێتن. ھەروهسا دەرفەتەکا بێ وێنە بوو ژ بۆ پشتبەستن ب شیانێن گەلێ کوردستانێ و وەرگرتنا وان مافێن کو سالێن دوور و درێژ ھاتبوونه دەستەسەرکرن.
سهرۆك مهسعود بارزانى ل داوییا پهیاما خوه دا دیاركر: د ههلكهفتا سهرهلدانا مەزنا بھارا 1991ێ کوردستانێدا دووپات د پەیاما ئاشتی و ئازادیخوازیا گەلێ کوردستانێ دكهین. ئەڤ پەیامه دڤێت ژ بۆ ھەروههر بلند و ساخ بمینیت.
