رۆمانیا بتنێ دێ 90 رۆژان ئاوارێن عیراقى وه‌رگریت

وه‌زاره‌تا ده‌رڤه‌ یا عیراقێ راگه‌هاند، حكومه‌تا رۆمانیا رازیبوویه‌ ئه‌و عیراقییێن ژ ئوكرانیا ئاواره‌بووین بۆ ده‌مێ 90 رۆژان ل وه‌لاتێ وێ بمینن.

وه‌زراه‌تا ده‌رڤه‌ یا عیراقێ د راگه‌هاندنه‌كێ دا ئاماژه‌ ب وێ یه‌كێ كرییه‌، سه‌رۆكێ فه‌رمانگه‌ها ئه‌ورۆپا ل وه‌زاره‌تا ده‌رڤه‌ دگه‌ل بالیۆزێ رۆمانیا ل عیراقێ كۆمبوویه‌ و په‌سنا هه‌لویستێ حكومه‌تا رۆمانیا كرییه‌ بۆ پێشوازیكرنێ ل وان عیراقییان یێن ژبه‌ر شه‌رێ رووسیا و ئوكرانیا ئاواره‌ى وى وه‌لاتى بووین.

ل گوره‌ى وێ راگه‌هاندنێ، بالیۆزێ رۆمانیا راگه‌هاندییه‌ عیراقى دشێن بۆ ده‌مێ 90 رۆژان ل وه‌لاتێ وى بمینن تا وى ده‌مێ ره‌وشا خوه‌ رێكدئێخن.
هه‌روه‌سا ئاماده‌ییا وه‌لاتێ خۆه‌ بۆ هاریكاریكرنا عیراقێ و وه‌لاتێن دى بۆ ڤه‌گۆهاستنا وه‌لاتییێن خوه‌ ژ وه‌لاتێ ئوكرانیا نیشاندا.