لەیلا قاسم، کچە تێکۆشەرا کورد، ل ساڵا ١٩٥٢ ل گۆندی بامیل یێ سەرب قەزا خانەقین ڤە ، ژ خێزانەکا ھەژار و نیشتمانپەروەرا کورد ژ دایکبویە.
قاسم حەسەن بابێ لەیلایێ، کرێکارێ کۆمپانیا پاڵاوگەھا نەفتا ئەلوەند بوو.
لەیلا قاسم ل سالا 1970یێ ب رێکا برایێ خوە یێ مەزن سەلامی پەیوەندی ب بزاڤا سیاسییا نەتەوەی کر و ل ناڤ ڕیزێن ‘ئێکەتیا قوتابیێن کوردستان” خەبات و تێکۆشان برێڤەبر.
لەیلایێ رۆلەکەکێ کاریگەر د ھشیار کرن و رێکخستنا قوتابیێن کورد یێن زانکۆیا بەغدا دا ھەبوو.
ل رۆژا 28/4/1974 لەیلا قاسم دگەل چوار ژ ھەڤالێن وێ بناڤێن (جەواد ھەمەوەند، نەریمان فوئاد مەستی، حەسەن حەمەڕەشید ، ئازاد سلێمان میران) ژ ئەنجامێ ھەوەکا بەرفرەھـ یا ھێزێن ئاسایش و لەشکەرێن ڕێژیما بەعس ل بەغدا ھاتنە دەستەسەرکرن.
ڕۆژناما (الثورة) یا زمانحالێ ڕێژیما بەعس یا دەستھەلاتدار و ڕادیۆ و تەلەڤزیۆنێن نافخویێن ئیراقێ، لەیلا قاسم و ھەڤالێن وێ وەک تێکدەر و تیرۆرست بناڤ کرن.
بەلێ دگەل ھەمی نەخوشی و ئازار و ئەشکەنجەکێشانا وان، بچویکترین کریارا گوماناوی ژی لەسەر وان ئاشکرا نەبوو.
ڕژیما بەعس ب مەبەستا چاڤترساندنا لاوان و قوتابیان و چینا رەوشەنبیرێن کورد، ئێکسەر پشتی دەستەسەرکرنا وان، ب رونشتنەکا دادگەھێ یا نە دادپەروەرانە، ل دژی لەیلا قاسم و ھەڤالێن وێ برێڤەبر و بریارا سێدارەدانێ بۆ دەرێخست.
ھێشتا دوو حەفتی ب سەر دەستەسەرکرنا وان دا دەرباز نەببوون، ل دەمژمێر 7ی سپێدەھیا ڕۆژا 12/5/1974 لەیلا قاسم و ھەر چوار ھەڤالێن وێ سێدارەدان.
سەلام قاسم برایێ لەیلایێ، ب دەمەکێ کورت پشتی سێدارەدانا لەیلایێ ب دەستێن رژێما بەعس ل بەغدا ھاتە شەھیدکرن.
تاوانا سەلام قاسمی ب تنێ ئەو بوو کو وێنەیێ لەیلایا خویشکا خوە دابو دەستێ قوتابیێن کورد و ئەندامێن ئێکەتیا قوتابیێن کوردستانێ ل ژدەرڤەی وەڵاتی.
پشتی شەھیدکرنا لەیلایێ و برایێ وێ دایک و بابێن وان ژ ئەگەرێ ژ دەستدانا دوو خوشتڤیێن خوە، ھەر زووی ب خەمەکا مەزن سەرێ خوە دانا و وەغەرا دوماھیێ کر.
هێمن لسەر قارەمانیا لەیلا دبێژیت:
کە تۆ تۆرای لە چاوم وەک خەوی من
لە بسکت رەشترە مانگەشەوی من
برۆ مەجنوون بە لەیلای خۆت مەنازە
کە ناوبانگی پتر دەرکرد ئەوی من
بزەی ھاتێ، وتی جەلادی خوێری!
بە کەیفی خۆت پەتت باوێژە ئەستۆم
ئەوە پەت نیە میدالی ئیفتخارە
کە بوومە قارەمانی میڵەتی خوم.
“مەتین عومەر”
