ئه‌ڤرۆ سێشه‌مبی 17/ 5 / 2022 ێ ” ل بارزان نێچیرڤان بارزانى ” سه‌رۆكێ هه‌رێما كوردستانێ بۆ خاتر خواستنێ پێشوازى ل ماتیو تۆله‌ر بالیۆزێ ئه‌مریكا ل عیراقێ كر” كو ئه‌ركێ وى ل عیراقێ ب دووماهی هات.
د دیداره‌كێ دا سه‌رۆك نێچیرڤان بارزانى سوپاسیا بالیۆزێ ئه‌مریكا ل عیراقی كر بۆ بزاڤ و هاریكاریێ د پێشڤه‌برنا په‌یوه‌ندیێن عیراقێ و هه‌رێما كوردستانێ دا ل گه‌ل ئه‌مریكا و هیڤیا سه‌ركه‌فتنێ د ئه‌ركێ وى یێ نوو دا بۆ خواست .
ژلایێ خوه‌ڤه ماتیو تۆله‌ر سوپاسیا نێچیرڤان بارزانى و سازیێن لایه‌نێن په‌یوه‌ندیدار یێن هه‌رێما كوردستانێ كر بۆ وێ هاریكارى و هه‌ماهه‌نگیا د ده‌مێ ئه‌ركێ وى دا ل عیراقێ ل گه‌ل وى و بالیۆزخانا ئه‌مریكا كر وهیڤى خواست ئه‌و هاریكارى و هه‌ماهه‌نگییه به‌رده‌وام بیت .
د ته‌وه‌ره‌كێ دیێ دیدارێ دا هه‌ردو ئالییان په‌یوه‌ندیێن عیراقێ و هه‌رێما كوردستانێ ل گه‌ل ئه‌مریكا و پێشڤه‌برنێ د بیاڤێن هاریكاریا هه‌ڤپشك و هاندانا سه‌رمایا ئه‌مریكا بۆ وه‌به‌رهێنانێ ل عیراقێ و هه‌رێما كوردستانێ گه‌نگه‌شه كر و تیشك خسته سه‌ر ره‌وشا عیراقێ و كێشه و ته‌حه‌دیاتێن به‌رامبه‌ر پروسێ و بزاڤێن ده‌ربازبوونێ ژ ره‌وشێ .
ره‌وشا هه‌رێما كوردستانێ و په‌یوه‌ندیێن دناڤبه‌را لایه‌نێن سیاسی و پرۆسا هه‌لبژارتنێن بهێن یێن هه‌رێما كوردستانێ و به‌رده‌وامییا گه‌فێن داعش ل ده‌ڤه‌رێ و هاندانا چالاكیێن ئابوورى ل هه‌رێما كوردستانێ چه‌ند ته‌وه‌رێن دی یێن دیدارێ بوون.
