کۆسرەت میران، وهك چاڤدێرهكێ سیاسی بۆ ئاژانسا خانی راگەهاند، دادگەھا بلندا فیدڕالی ل سەر بنەمایەکێ دەستووری نەھاتییە پێکئینان، سالا 2021ێ دەمێ پڕۆژە قانوونا دادگەھا فیدڕالی چوویە پەرلەمانێ عیراقێ ب مەرەما راستڤەکرنێ ل دووڤ ماددێ 92ێ پێدڤی بوو ب دەنگێ دوو ل سەر سێ یا پەرلەمانتاران بھێتە راستڤەکرن، بەلێ مخابن ب زۆرینەیەکا سادە ھاتە دەربازکرن، بڕیارا دادگەھا فیدڕالی دژی بادەکا پەترۆل و غازا ھەرێما کوردستانێ ل دووڤ دوو قانوونێن سەردەمێن رژێمێن بەرێ یێن عیراقێ بوویە، ھەردوو قانوون ب شێوەکێ مەرکەزی ھاتینە دەرکرن.
کۆسرەت میران بەگی دیارکر: ھندەك قانوونێن سەردەمێ رژێمێن بەرێ دگەل سیستەمێ فیدڕالی و رەوشا نوکە یا عیراقێ ناگونجن، لەوڕا باشترین چارەسەر ئەوە قانوونا ئێکگرتی یا پەترۆل و غازێ بھێتە دەرکرن و ھەرێم و بەغدا ل دۆر بابەتێ کەرتێ پەترۆلێ بگەھنە رێککەڤتنێ و مافێ دەستوورییێ ھەرێما کوردستانێ ژی بەرچاڤ بھێتە وەرگرتن، بەرۆڤاژی ئێك لایەن بەغدا نەشێت سەرەدەریێ دگەل کەرتێ پەترۆلا ھەرێما کوردستانێ بکەت.
