سهرۆكایهتییا ههرێما كوردستانێ راگههاندنهك ل دۆر كۆمبوونا لایهنێن سیاسى بهلاڤكر
سهرۆكایهتییا ههرێما كوردستانێ دراگههاندنهكێدا ل دۆر كۆمبوونا لایهنێن سیاسى یێن ههرێما كوردستانێ ل سهرۆكایهتییا ههرێمێ دیاركر، ههموو ئامادهبوویى ل سهر پێدڤییا كرنا گهرهكا دى یا ههلبژارتنێن سهركهڤتى ب جۆرهكى كو دبهرژهوهندییا ههرێما كوردستانێ و پێشڤهبرنا پرۆسهیا دیمۆكراسى دا ل سهر ههموو بهرژهوهندییان كوكبوون، و سهرۆكایهتییا ههرێما كوردستانێ دێ ل سهر بزاڤێن خوه بۆ چارهكرنا وان كێشهیێن كهڤتینه درێكا یاسایا ههلبژارتنان دا یا بهردهوام بیت.
دهقێ راگههاندنا سهرۆكایهتییا ههرێما كوردستانێ:
بهلاغا داوییێ یا كۆمبوونا لایهنێن سیاسى یێن ههرێما كوردستانێ ل سهرۆكایهتییا ههرێمێ.
ئهڤرۆ پێنجشهمبى 9ى خزیرانا 2022ێ، ب سهرپهرشتییا سهرۆكێ ههرێما كوردستانێ نێچیرڤان بارزانى و ب بهرههڤبوونا نوونهرا تایبهت یا نهتهوهیێن ئێكگرتى و تیما بسپۆر یا ههلبژارتنێن سهر ب یونامى ڤه، كۆمبوونا لایهنێن سیاسى یێن ههرێما كوردستانێ ل سهرۆكایهتییا ههرێمێ هاته برێڤهبرن.
كۆمبوون یا تایبهت بۆ ب بهرههڤییێن ههلبژارتنێن بهێن یێن بهرلهمانێ كوردستانێ و بزاڤێن لێك نێزیككرنا بیر و بوچوونێن لایهنان ل سهر یاسایا ههلبژارتنان و كومسیۆنا بلند یا سهربهخۆ یا ههلبژارتنان و راپرسى و چهندین بابهتێن دى یێن گرێداى ههلبژارتنانڤه.
دكۆمبوونێ دا ب توندى ئیدانهیا وێ هێرشا تیرۆرستى هاتهكرن ئهوا شڤێدى 8 خزیرانا 2022ێ ب درۆنهكا بۆمبهكرى ل سهر ههولێرا پایتهختێ كوردستانێ هاتییه كرن و زیانێن گیانى و ماددى گههاندینه وهلاتییێن سڤیل، و ئهڤ چهنده ب گهفهكا جددى بۆ سهر ئاسایش و سهقامگێرییا عیراقێ هژمارت، دڤى بیاڤى دا داخواز ژ حكومهتا عیراقێ هاتهكرن كو پێدڤییه داوییێ ب ڤان دهست درێژییان بینیت، و ب ههماههنگى و هاریكارییا دهزگههێن ئهمنى یێن ههرێما كوردستانێ بزاڤێن جددى بۆ رێگرتنا دووبارهبوونا ڤان جوره هێرشان بهێنهكرن.
ههر دڤێ كۆمبوونێ دا سهرۆكێ ههرێما كوردستانێ سوپاسییا بزاڤێن نوونهرا تایبهت یا نهتهوهیێن ئێكگرتى ل عیراقێ و خهما وان بۆ رهوشا ههرێما كوردستانێ و بابهتێ ههلبژارتنان كر، ههروهسا سوپاسییا لایهنێن سیاسى بۆ رازیبوونا وان ل سهر داخوازنامهیا بهرههڤبوونێ كر.
پشتى دانوستاندن و گهورینا بیر و بوچوونان، ههموو ئامادهبوویى ل سهر پێدڤییا كرنا ههلبژارتنێن سهركهڤتى ب جۆرهكى كو دبهرژهوهندییا ههرێما كوردستانێ و پێشڤهبرنا پرۆسهیا دیمۆكراسى دا ل پێشییا ههموو بهرژهوهندییێن دى بیت رێككهڤتن، و سهرۆكایهتییا ههرێمێ دێ ل سهر بزاڤێن خوه بۆ چارهرسهركرنا وان كێشهیێن لبهردهم یاسایا ههلبژارتنان ماین یا بهردهوام بیت، و بۆ ڤێ مهرهمێ دكۆمبوونێ دا بریار هاته دان سكێرتارییهك ژ سهرۆكایهتییا ههرێمێ و ب ههماههنگى دگهل تیما یونامى بۆ دوڤچوون و بهردهوامییا بزاڤێن دگهل لایهنێن سیاسى ههتا ئێكى تهموزا 2022ێ بهێته پێكئینان و راپۆرتهكێ ل دۆر ئهنجامان بهرههڤ بكهت.
ههموو لایهنان بزاڤێن سهرۆكێ ههرێمێ بۆ لێك نێزیككرنا لایهنێن سیاسى بلند نرخاندن، و دووپاتكرن دڤى بیاڤى دا پشتهڤانییا پێنگاڤێن سهرۆكایهتییێ بكهن، ههروهسا سوپاسییا بزاڤێن نوونهرا نهتهوهیێن ئێكگرتى كر.
