ئاژانسا خانی، تایبەت:
بەرپرسەکێ وەزارەتا پێشمەرگەیی دیارکر، وەزارەتا پێشمەرگەیی بزاڤان دکەت بۆ بدەستڤە ئینانا فڕۆکێن بێفڕۆکەڤان، بەلێ حوکمەتا عێراقێ رێگرە و ناھێلیت پێشمەرگەیی ئەو جۆرێ فڕۆکان ھەبیت.
جەبار یاوەر، ئەمیندارێ گشتیێ وەزارەتا پێشمەرگەیی بۆ ئاژانسا خانی گۆت” زۆربەیا لەشکەرێن جیھانێ مفا ژ درۆنان وەرگرتییە و سوپایێ عێراقێ و حەشدا شەعبی ژی فڕۆکێن بێفڕۆکەڤان ھەنە، وەزارەتا پێشمەرگەیی ژبەر نەبوونا بودجەیی داخواز کرییە ھەڤپەیمان فڕۆکێن بێفڕۆکەڤان بۆ پێشمەرگەیی دابین بکەن، ھەڤپەیمان رازیبووینە و بودجە ژی مەزاختیە، بەلێ حوکمەتا عێراقێ رێگرە و رەزامەندیێ نادەت ھەڤپەیمان فڕۆکێن بێفڕۆکەڤان بدەنە وەزارەتا پێشمەرگەیی.
جەبار یاوەر ئاشکرا کر ژی” مەرەما بدەستڤە ئینانا فڕۆکێن بێفڕۆکەڤان ب تنێ بۆ چاڤدێریا لڤینێن داعش و پاراستنا ھەرێما کوردستانێ یە، چونکی سەردەمێ نوکە ھەموو جیھانێ مفا ژ فڕۆکێن درۆن وەگرتییە بۆ مەرەمێن شەڕی و چاڤدێری و سیخۆریێ، لەوما پێدڤییە پێشمەرگە ژی مفایی تەکنەلۆژیا نوو وەربگریت و فڕۆکێن بێفڕۆکەڤان ھەبن، هەکە بھێت و ئەم ببینە خودانێن ئەڤان جورێن فڕۆکان دێ پشکا درۆنان ل وەزارەتێ ھێتە ڤەکرن.
