بڕیارە دەزگه‌هێ نیشتیمانی بۆ خوارنێ و دەرمانان بهێته دامه‌زراندن و ئەندامه‌كا لژنا ساخله‌مییێ ل پەرلەمانێ کوردستانێ دیار كر: ب دامەزراندنا دەزگه‌هه‌كێ نیشتیمانی” دێ دووماهی ب پرسا خوارنێ و دەرمانێن قه‌چاخ و ده‌م ب سەرچوویه هێت.
رۆژان سلێڤانەیی، ئەنداما لژنا ساخله‌مییێ ” بۆ ئاژانسا خانی راگەهاند: “دامەزراندنا دەزگه‌هێ نیشتیمانی یێ خوارنێ و دەرمانان ئێکە ژ کارنامێن حکومەتا ھەرێما کوردستانێ و بڕیارە دەزگه‌هه‌كێ نیشتیمانی بۆ خوارنێ و دەرمانان بهێته دامه‌زراندن، مه ژی وەک پەرلەمان بزاڤ كرینه ل گەل حکومەتێ بۆ هندێ وی دەزگه‌هی دابمەزرینین، حکومەت ژی گه‌له‌ك یا رژده ل سه‌ر دامەزراندنا وی دەزگه‌هی.
وێ ئەنداما لژنا ساخله‌مییێ ئاشكرا كر: “خوارنێ و دەرمان دکەڤنە چارچۆڤێ ئاسایشا نەتەوەیی و پێدڤییە ب تەمامی ل ژێر کۆنترۆلێ دابن، چونكی پەیوەندی ب ژیانا وه‌لاتییان ڤه هه‌یه.
رۆژان سلێڤانەیی گۆت ژی: “ب دامەزراندنا دەزگه‌هێ نیشتیمانی یێ خوارنێ و دەرمانان دێ شێین بابەتێ دەرمان و خوارنێ کۆنترۆل كه‌ین، ئه‌م دبینین ڕۆژانە دەرمان و خوارنێن ده‌م ب سەرڤه‌چوویی بێ کوالێتی دەست ب سەردا دهێته گرتن، بەلێ هه‌كه دەزگه‌هه‌ك ھەبیت ئینانا خوارنێ و دەرمانان ب شێوێ نه یاسایی دێ ب دووماهی هێن.
