سه‌رۆكێ حكومه‌تا هه‌رێما كوردستانێ مه‌سرور بارزانى ل سه‌ر ئه‌كاونتێ خوه یێ فێسبۆكى راگه‌هاند، ئه‌ڤرۆ پێنجشه‌مبى 16 خزیرانا 2022ێ وان پێشوازییا بالیۆزا نوو یا ئه‌مریكا ل عیراقێ كر.
سه‌رۆكێ حكومه‌تێ دیاركر دكۆمبوونه‌كێ دا كو كۆنسلێ گشتى یێ ئه‌مریكا ل هه‌ولێرێ رۆبه‌رت پاله‌دینۆ ژى یێ به‌رهه‌ڤبوو، وان پیرۆزباهییا كاركرنێ ل بالیۆزا نوو یا ئه‌مریكا كر، و داخوازا سه‌ركه‌ڤتنێ دئه‌ركێن وێ یێن نوودا بۆ پێشڤه‌برنا په‌یوه‌ندییێن هه‌رێما كوردستانێ و ئه‌مریكا كر، پاشان كورتییه‌ك ل دۆر چاكسازییا كابینه‌یا نه‌هێ دهه‌موو بیاڤان دا ب تایبه‌ت ژێده‌رێن داهاتى دیاركر.
زێده‌تر مه‌سرور بارزانى ئاشكراكر، دته‌وه‌ره‌كێ دى یێ كۆمبوونێ دا ئاماژه ب په‌یوه‌ندییێن دناڤبه‌را هه‌رێما كوردستانێ و حكومه‌تا فیدرال یا عیراقێ دا هاته دان، و دووپاتى ل وێ چه‌ندێ كر كو خه‌لكێ كوردستانێ خۆدان دوز و مافێن نه‌ته‌وه‌یى و ده‌ستوورییه، و كێشه‌یێن دگه‌ل به‌غدا ب تنێ بودجه و په‌ترۆل نینن، به‌لكو كوردستان هه‌رێمه‌كا فیدرالى و ده‌ستوورییه و پێدڤییه ل دۆڤ ده‌ستوورى سه‌ره‌ده‌رى دگه‌ل هه‌رێما كوردستانێ بهێته‌كرن.
ژلایێ خۆڤه بالیۆزا نوو یا ئه‌مریكا پاپه‌ندبوونا وه‌لاتێ خوه ب به‌رده‌وامیدانا پشته‌ڤانیكرنا هه‌رێما كوردستانێ وه‌ك هه‌ڤپشكه‌كا گرنگ یا ئه‌مریكا و سه‌قامگێری و ئاشتى و ئاسایشا عیراقێ دووپاتكر.
هه‌روه‌سا به‌حس ل هندێ كر، كو عیراق و هه‌رێما كوردستانێ به‌شه‌كێ گرنگن دسیاسه‌تا ئه‌مریكا دا و دووپاتى ل گرنگییا پێكئینانا حكومه‌تا نوو یا عیراقێ ل ئاستێ داخوازییێن خه‌لكێ عیراقێ كر.
