عەلی حەفزوللا
یێ ب سادەیی تەماشەی هند وێبسایت و پەیج و ئەکاونت و…هتد، ل تورا ئنتەرنێتێ و سوشیال مەدیایا کوردی و تایبەت ئەوێن ب زاراڤێ سورانی بکەت، دێ هزر کەت ئەڤە شەرێ جیهانی یە ل ڤێ دەڤەرێ دەستپێکریە و ئارمانج ژێ تنێ نەهێلانا هەرێمێ یە.. باشە ما ئەم بوینە ئەلمانیا نازی یا دەمەکی یان روسیا نوکە؟!
ئێ باشە هەردوو شەرێن بەرێ یێن جیهانی ل ئوروپا دەستپێکریە و یێ سیێ ژی وەک پێشبینی دەستپێک هەر دێ ل وێرێ بیت کو نوکە جیهان ل سەر پەلەکا سوورە و هندە ببیتە گوریەکا دژوار وڤولکانەک هەمی جیهانێ ب سوژیت ژ ئەگەر شەرێ ب وەکالەتێ روژئاڤا (ئوروپا وئەمریکا) دگەل روسیا!..نزانم چ دبێژنە ڤێ قەرەبالغ و فرتە فرت و هوسێ ئەوا ئەڤ مەدیایە ل کوردستانێ پەیدادکەن!
دوخەکە ئالوزە… رەوشەکە شلەژاوە… ئیتر تەواو بوو… کومپانیەکان کوردستان بە جێ دەهێلن…. ئابوری سەربخو کوتایی هات دلخوشی… گورزێکی تری گەورە بە کەرتی نەوت کەوت… هێزێکی زۆر بەروە کوردستان جولەی پێکرا… دووبارە موشەکباران دەستپێکر… بە دروون هێرش کرایە… ئامادەیی بەرگری بکەی… و وووو …هتد. ئەڤە و چەندێن دیتر هند مانشێت و سەرنوچەیێن ڤان دامودەزگەهانە.
راستە کێماسی دزورن.. ژ قەیرانان و…. تا نەدامەزراندنێ، لێ ئایا ب ڤان جورە مانشێت ونوچەیێن ڤان دامودەزگەهان چ دێ هێتە گوهرین؟!.. و هەر د بنەرەت دا چ پەیوەندی ناڤبەرا وان هەیە؟.. بەرەڤانیێ ژحکومەتێ ناکەم ژبەرکو بریارێن وێ یێن وەک پاشەکەفت و نەدامەزراندن و کومپانیێن بێ مفا و رامان و…..هتد، ناهێنە پەردەپوشکرن، خوازیارین وەک حکومەتا سوێد بوو ژ هەمی لایەکیڤە، لێ بەلێ حەز تشتەکە و واقع تشتەکێ دی دگەل ل بەرچاڤ وەرگرتانا فشار و کارتێکرنا دەوروبەران.
ژ من وەرگرن (نە سیاسەتمەدارم و نە شروڤەکارێ سیاسی)، لێ بەلێ چ تشتەکێ وەسا روی نادەت، رەوش هەما هوسا ب سادەیی نەهاتیە راگرتن، ئەڤە هاوکێشەیێن نیڤدەولەتینە، نابیت یا کێم بو خو دانین بەلێ تڤیا دانپێدانێ بکەین و دراستگوبین، نە ئەم دشێین خو ل بەر ئیرانێ و نە ترکیا و تا نە لەشکەرێ عیراقێ دگەل حەشدا شەعبی و ب وێ جبەخانەیا لەشکەری و فروکێن ئێف ١٦ بگرین و دبیت تنێ پشتی چەند روژان ژناڤ بچین لێ تا ئوکێ یا ئەمریکا و فیتیا هند وەلاتێن دیتر نەبیت.. ژبلی گەفا و کاتیوشەیەکا بەرەللا، ئێک هێرش بەر ب کوردستانێ ناهێت!.. ئاخر هەر ئێکی رول و سنور بو هاتیبنە دەستنیشانکرن و نابیت ب بەزینیت.. راستە ئەمریکا بەرژەوەندخازە ونە دوستا جهێ باوەریێ یە لێ تا نوکە بریار نەدایە سیاسەتا خو ل دەڤەرێ بگوهریت و عیراقێ و هەرێمێ ب ئێکجاری بو کەسێ بهێلیت.
پشتگوهخستن یان تەماشەکرنا سادە بۆ ڤان سەرنوچە و پەیامێن ل پشت یێن ڤان دەزگەهان و ئەو رولێ ئەو دگێرن و کارتێکرنا نەرێنیا پەیدا دکەن نەیا بەرئاقلە و پێتڤییە سەرەاوەستان هەبیت.. و ژ دەرئەنجامان بو نمونە:
پەیداکرنا ترسێ و نە ئارامیێ دناڤا وەلاتیان دا…. پتر هاندانا ڤان لایەنێن هێرشبەر…. مەزنکرنا ئاریشەیا. کارتێکرن ل بازاری…. زێدەکرنا نەباوەریێ ناڤەبەرا سێکوچەیا (هاولاتی ، ئالیێن سیاسی ، حکومەت) پەیداکرنا بێ ئومێدیێ و نەباوەریێ ب دوزا خو وتا ب خو بخو دناڤا خەلکی دا ب گشتی و پێشمەرگەی ب تایبەتی.. و کارکرن ل سەر لاوازکرنا وەریا دلسوزان، و….هتد.
و بێ گومان مفادارێ سەرەکی ژڤێ چەندێ هەر لایەنێن دەرەکینە.
ئەگەر ئارمانج ژێ گوهرینا دەستهەلاتێ یە.. بێ گومان ب ڤی رەنگی ناهێتە گوهرین.
ئەگەر ئارمانج ژێ ئازراندن و هاندانا جاددێ یە دژی لایەنەکێ دەستنیشانکری.. بێ گومان دەرئەنجام گشتگیرن وئەگەر رەوش ئالوزبوو کەس ژێ رزگار نابیت ودەمێ پاپور ل نیڤا دەریایێ بنئاڤ دبیت قومتان و کارمەند و نەفەر و …هتد هەمی پێکڤە دخەندقن.
ئەگەر ئارمانج ژێ گونەهبارکرنا لایەنەکی بیت.. بێ گومان چ لایەن دبێ گونەهـ نینە ژبەرکو هەمی لایەن پشکدارن یان بەری نوکە پشکداربوینە د حکومەتێ دا و ئەو رەوشا نوکە هەیی دەرئەنجامێ کەلەکەبوونا کێم وکاسیێن چەندین سالانە و هەر ئێکی ل دویف قەبارێ وی بەرپرساتی بەردکەڤیت، لێ رەڤین ژ بەرپرساتیێ ب هێرشێن پشترا، دچیتە دچارچوڤێ، مەلاقی و خوشرینکرنێ دا… و ئستیغلالکرنا دەرفەتان.. یان بابەت هەر تنێ لایک و کومێنتن و زێدبوونا تەماشەڤانان ب ئارمانجێن بازرگانی مینا وەرگرتنا پارەکی ژ کومپانیێن تورێن جڤاکی… یان بناڤ و دەنگ خستنا مەدیایەکێ ب ئارمانجا ب کارئینانێ ل روژێن هەلبژارتنان ..یان فروتنا دەزگەهی ل پاشەروژێ ب کوژمەکێ مەزن بو لایەنەکێ سیاسی.
خوازیارین مە راگەهاندن و تایبەت سوشیال مەدیایەکا ب راستی سەربخو هەبوو دویر ژ لایەنگری و دژایەتی و پیلانگێری و…هتد… و خوزیا مەزنتر… خوزی هەمی دامودەزگەهێن مەیێن راگەهاندنێ ب گشتی و سوشیال مەدیایێ ب تایبەتی ب هەستەکا نەتەوایەتی، نشتیمانپەروەری، بەرژەوەندا گشتی و گرنگیردان ب هاولاتی کار کربوو دویر ژ حزبایەتی و دەڤەری و بەرژەوەندێن بەرتەسک..
