ئه‌ڤرۆ شەمبییێ ٢ی تەموزا ٢٠٢٢ ێ ل سەلاحەدین ، سەرۆک مەسعود بارزانی ل گەل فراکسیۆنا پارتی دیموکراتی کوردستان ل جڤاتا نوونه‌رێن عیراقێ کۆمبوو.
د وێ کۆمبوونێ دا ره‌وشا سیاسییا عیراقێ و داوی گاڤ و گوهۆرینێن دناڤا پرۆسا سیاسییا عیراقێ دا هاتنه به‌حسكرن.
سەرۆک بارزانی سه‌ره‌رایی ئاماژەدان ب ھەلبژارتنێن ئۆکتۆبەرا ٢٠٢١ ێ یێن عیراقێ و ئەنجامێن وێ، ئاماژە ب هندێ دا كو ھەموو پێداگیری و بزاڤێن پارتی د پڕۆسا پشتی هەڵبژارتنان دا بۆ هندێ بوون كو ئەنجامێن ھەلبژارتنان خزمەتا سەقامگیری و ژیانا وه‌لاتییان و چارەسەرکرنا کێشان بکه‌ت.
سەرۆک بارزانی گۆت ژی: گوهۆرینێن سیاسی و هه‌ڤکێشە ھەر چاوان بن ئه‌م خودانێن دۆزه‌كا ڕەواینه و دڤێت ئاریشه ب ڕێیا پابەندبوون ب دەستوری و لبه‌رچاڤ وه‌رگرتنا ھەر سێ پڕەنسیپێن شەراکەتێ و تەوافوقێ و تەوازنێ بهێنه چارەسەر كرن و ئەڤ پڕەنسیپە دڤێت ل سەر کارێ حکومەتا بهێت و ھەموو کوتلێن سیاسی ڕەنگڤه‌ده‌ت.
سەرۆک بارزانی دیار كر ژی: پارتی ل گەل ناکۆکی و كویربوونا قەیرانان دا نینە” بەلکی ئەوا لده‌ف پارتی گرنگ پاراستنا مافێن دەستوری و کەرامەتا وه‌لاتییانە.
سەرۆک بارزانی ژ پێخه‌مه‌ت باشتربوونا ئەرک و کارێ نوونه‌رێن پارتی ل جڤاتا نوونەرێن عیراقێ شیره‌ت و كارێن پێدڤی ب روونی به‌رچاڤ كرن، دووپاتی ل هندێ كر” پێدڤییه ئەندامێن فراکسیۆنا پارتی ل جڤاتا نوونه‌رێن عیراقێ خۆ ب خزمەتکارێن وه‌لاتییان و دەنگدەران و خۆ ب بەرگریکارێن مافێن خەلکی بزانن و کارێن وان پتر بیت ژ ئاخفتنێ.
