ئاسایشا هه‌رێما كوردستانێ: تیرۆرست ل هه‌ر جهه‌كى بن دێ باجا كریارێن خوه‌ ده‌ن

جڤاتا ئاسایشا هه‌رێمێ دیاركر، ل شه‌ڤا 2ى كانوونا ئێكێ یا سالا 2021ێ تیرۆرستێن داعشێ ب رێكا دوو مه‌فره‌زه‌یان و ب سه‌رپه‌رشتییا تیرورست ( حاچم محه‌مه‌د ره‌شید ره‌بیع ئه‌لئیسحاقى ) ب ناسناڤێن ( ئه‌بو عادل، نه‌بیل، عه‌بدلموهه‌یمه‌ن ) جێگرێ والییێ دیجله‌ و ب سه‌رپه‌رشتییا رێكخراوا تیرۆرستى یا داعشێ ل سنوورێ قه‌ره‌چووغ و مه‌خمور هێرشى گوندێ خدرجیجه‌ ل بنارێن چیایىێ قه‌ره‌چووغ كر و تێدا 10 پێشمه‌رگه‌ و سێ وه‌لاتى كو هه‌ر سێ برایێن ئێك بوون شه‌هیدبوون.

پشتى دوڤچوون و پشت به‌ستن ل سه‌ر زانیارییێن هه‌والگێرییێ، ئه‌و جهێ تیرۆستان خوه‌ لێ ڤه‌شارتى كو دكه‌ڤته‌ سنوورێ ژێر ده‌ستهه‌لاتا حكومه‌تا فیدرال هاته‌ ده‌ستنیشانكرن.

ل ئێڤارییا 5ێ ته‌مو‌زا 2022ێ ب هه‌ماهه‌نگییا دگه‌ل هێزێن هه‌ڤپه‌یمانان و هێزێن عیراقێ، شیان تیرۆرست ( حاچم محه‌مه‌د ره‌شید ره‌بیع ئه‌لئیسحاقى ) و سێ تیرۆرستێن دى بكه‌نه‌ ئارمانج و ب سزایێ وان ب گه‌هینن، ئێك ژ وان سێ تیرۆرستێن هاتییه‌ كوشتن ب ( سالح مه‌حموود عه‌تیه‌ ئه‌لجبورى ) یێ ناسیاربوو ب ( ئه‌لنه‌سیب ) یێ ب ناڤوده‌نگبوو‌ و میرێ مه‌فره‌زه‌یه‌كا داعشێ ل چیایێ قه‌ره‌چووغ بوو.

پشتى دوڤچوونه‌كا كویر و كۆمكرنا زانیارییێن درووست ژلایێ جڤاتا ئاسایشا هه‌رێما كوردستانێ ڤه‌، تۆمه‌تباره‌ك ب ناڤێ ( ق. ى. ح. ا ) هاته‌ ده‌سته‌سه‌ركرن، و دڤه‌كۆلینێدا دان پێدان ب هاریكارییا وێ مه‌فره‌زه‌یا تیرۆرستێن داعشێ كر.

جڤاتا ئاسایشا هه‌رێما كوردستانێ وه‌لاتییێن خوه‌ پشت راستكرن، كو دامه‌زراوه‌یێن جڤاتا ئاسایشا هه‌رێما كوردستانێ بۆ ئارامى و ئاسایشا هه‌رێما كوردستانێ دێ هه‌موو ده‌مان دچاڤ ڤه‌كرى بن و بێى وه‌ستیان دئه‌ركێن خوه‌دا بن، تیرۆرست ژى ل هه‌ر جهه‌كى بن دێ باجا كریارێن خوه‌ یێن ترسنۆك ده‌ن و گه‌هنه‌ سزایێ خوه‌ و تۆمه‌تبار دێ  كه‌ڤنه‌ به‌رامبه‌ر دادگه‌هێ.