نێچیرڤان بارزانی سەرپەرشتییا کۆمبوونەکا بلندا سەربازی و ئەمنی كر

ئەڤڕۆ سێشەمبی 2026/3/10، نێچیرڤان بارزانی، سەرۆکێ هەرێما کوردستانێ و فەرماندێ گشتییێ هێزێن پێشمەرگەیی، ل سەرۆکاتیا هەرێما کوردستانێ و ب ئامادەبوونا شێخ جەعفەر شێخ مستەفا، جێگرێ سەرۆکێ هەرێمێ، سەرپەرشتیا کۆمبوونەکا بلندا سەربازی و ئەمنی کر، د کۆمبوونێ دا وەزیرێ پێشمەرگەیی، وەزیرێ ناڤخۆ، سەرۆک ئەرکانێ پێشمەرگەیی و فەرماندێن بلندێن پێشمەرگەیی ئامادە بوون.
د کۆمبوونێ دا، ب هووری رۆناهی خستە سەر داوی پێشهاتێن ئەمنی یێن دەڤەرێ و ئەنجامێن شەڕی و کارتێکرنێن وی یێن مەترسیدار بۆ سەر هەرێما کوردستانێ، هەروەسا چەندین بڕیار و ڕێنمایی بۆ بهێزکرنا پاراستنا ئاسایش و ئارامیا هەرێمێ و چەوانیا سەرەدەرییێ ل گەل دەزگەهێن ڕاگەهاندنێ و پێشهاتان دەرکرن.
نێچیرڤان بارزانی دوپاتکر، هەرێما کوردستانێ ب چ ڕەنگان نابیتە پشکەک ژ شەڕ و هەڤرکییان، و پاراستنا ئارامییا وەلاتی دێ ل پێشیا کاران بیت، هەروەسا ب چ رەنگان ڕێك ناهێتە دان ئاخا هەرێما کوردستانێ ببیتە ژێدەرێ گەف و مەترسییێ بۆ سەر کۆمارا ئیسلامیا ئیرانێ یان هەر وەلاتەکێ دی یێ جیران.
د تەوەرەکێ دی دا، ب توندی ئیدانەیا وان هێرشێن تێکدەرانە هاتە کرن یێن کو ژ لایێ گروپێن یاسا دەرکەفتی یێن عێراقێ ب درۆن و مووشەکان دهێنە سەر هەرێما کوردستانێ و زیانێن گیانی و مالی ل دویڤ خۆ ئیناینە. گۆت ژی: حکومەتا فیدرالییا عێراقێ بەرپرسە ئەرکێ خۆ بجهبینیت بۆ ڕێگریکرنێ ل ڤان هێرشان و دیتن و سزادانا ئەنجامدەران، چونکی ئەڤ هێرشە بنپێکرنا سەروەرییا وەلاتی نە و گەفن بۆ سەر سەقامگیریا گشتی.
د کۆمبوونێ دا، هەڤسۆزی و هەڤخەمی دگەل مالباتێن شەهید و بریندارێن هێرشێن سەر هەرێمێ هاتە دیارکرن، هەروەسا دەستخۆشی ل هێزێن پێشمەرگەیی و دەزگەهێن ئەمنی هاتە کرن بۆ ماندیبوون و شەڤنخونیا وان ژ پێخەمەت پاراستنا ئاخ و خەلکێ کوردستانێ دا.