مه‌سرور بارزانى وه‌زیرێ ساخله‌مییێ راسپارد سه‌ره‌دانا نه‌خۆشخانه‌یێن دهۆك و زاخۆ بكه‌ت

سه‌رۆكێ حكومه‌تا هه‌رێما كوردستانێ مه‌سرور بارزانى، وه‌زیرێ ساخله‌مییێ راسپارد سه‌ره‌دانا نه‌خۆشخانه‌ییێن دهۆك و زاخۆ بكه‌ت، پشتى ژ ئه‌گه‌رێ تۆپبارانكرنا توركیا ل ده‌ڤه‌را گه‌شتیارى یا گوندێ په‌ره‌خێ یێ سه‌ر ب ئیداره‌یا سه‌ربه‌خۆ یا زاخۆڤه‌، 9 گه‌شتیاران گیانێ خوه‌ ژ ده‌ستدایى و 26ێن دى برینداربووین.

وه‌زاره‌تا ساخله‌مییا هه‌رێما كوردستانێ  ئه‌ڤرۆ 20ى ته‌موزا 2022ێ راگه‌هاندنه‌ك به‌لاڤكر و تێدا هاتییه‌، بۆ چاڤدێریكرنا برینداران و گه‌هاندنا په‌یاما ( هه‌ڤخه‌مى و دلگرانییێ ) سه‌رۆكێ حكومه‌تا هه‌رێما كوردستانێ، وه‌زیرێ ساخله‌مییێ بۆ سه‌ره‌دانكرنا نه‌خۆشخانه‌ییێن دهۆك و زاخۆ راسپارد.

هه‌روه‌سا دراگه‌هاندنێ دا هاتییه‌، وه‌زیرێ ساخله‌مییێ ب نوونه‌رییا سه‌رۆكێ حكومه‌تێ، دێ دوڤچوونا ره‌وشا ساخله‌مییا بریندارێن روودانا ئه‌ڤرۆ یا ده‌ڤه‌را گه‌شتییارى یا گوندێ په‌ره‌خێ كه‌ت، و به‌رهه‌ڤییا حكومه‌تا هه‌رێما كوردستانێ بۆ چاره‌سه‌ركرنا برینداران و دابینكرنا هه‌موو پێدڤییان دووپاتكر.