ئه‌كته‌رێ ناڤدارێ جیهانى و ستێرا چینی جاكى چان، دێ نووترین فلمێ خوه ل وه‌لاتێ سووریا ل باژێرێ دیمه‌شقێ وێنه كه‌ت كو ئه‌و ب خوه به‌رهه‌مهێنه‌رێ فلمى یه.
ل دووڤ زانیارییان، فلم بناڤێ ( ئو‌په‌راسیونێن مالێ) یه، چیرۆكا فلمى به‌حس ل رزگاركرنا 600 وه‌لاتیێن چینى ل یه‌مه‌نێ دكه‌ت كو ل سالا 2015 شه‌ر ل یه‌مه‌نێ روودابوو و ئه‌و وه‌لاتییێن چینى ل وێرێ ئاسێ ببوون.
ئاژانسا فرانس پرێس دیاركرییه، دوو ئه‌گه‌ر هه‌نه فلمێ جاكى چانى ل سووریا بهێته وێنه كرن، ئه‌گه‌رێ ئێكێ ئه‌وه كو وه‌لاتێ یه‌مه‌نێ جهه‌كێ ب مه‌ترسی یه بۆ وێنه كرنا فلمه‌كێ ب ڤى جووری، ئه‌گه‌رێ دووێ ژى ئه‌وه كو مه‌زاختن ل وه‌لاتێ سوریا كێمترن.
هه‌روه‌سا ل دووڤ زانیارییان، جاكى چان ل جهێ وێنه‌كرنا فلمى ئاماده نه‌بوویه به‌لێ تیمه‌كا مه‌زنا فلمى به‌رهه‌ڤییان ل ده‌ڤه‌را حه‌جه‌ر ئه‌لئه‌سوه‌د یا كو دكه‌ڤیته باژێرێ دیمه‌شقێ ل وه‌لاتێ سووریا دكه‌ن.
جاكى چان ئه‌كته‌ره‌كێ هه‌رێ ب ناڤوده‌نگه ل هه‌موو جیهانێ، ل باژێرێ هونكونگ ژدایك بوویه و نوكه ژیێ وى 68 ساله و پشكدارى د گه‌له‌ك فلمێن ئه‌كشن دا كرییه.
