هه‌ڤپه‌یمانییا چارچۆڤێ هه‌ماهه‌نگییێ هه‌لویستێ خۆ ل سه‌ر خۆنیشاندانێن به‌غدا ده‌ربری و دیار كر: عێراق و شه‌رعیه‌تا وێ و سازی یێن ده‌ستووری هێلا سۆرن و دڤێت هه‌موو عێراقی ئاماده بن ب شێوه‌كێ ئاشتییانه به‌رگریێ ژێ بكه‌ن .
ئه‌ڤرۆ شه‌مبیێ 30/7/2022 ێ، لایه‌نگرێن سه‌دری خۆنیشاندانێن مه‌زن ل به‌غدا ده‌ست پێكرن و په‌رله‌مان و جڤاتا دادوه‌ری و چه‌ند جهێن دی گرتینه، چارچۆڤێ هه‌ماهه‌نگییێ به‌یاننامه‌ك ده‌ركر و راگه‌هاند: ب نیگه‌رانیڤه چاڤدێرییا وان روودانان دكهین یێن به‌غدا به خوه‌ڤه دبینیت د ڤان چه‌ند رۆژان دا، ب تایبه‌تی چوونا خه‌لكی بۆ سه‌ر سازی یێن ده‌ستووری و چوونا وان بۆ سه‌ر په‌رله‌مانی و ده‌ستهه‌لاتا دادوه‌ری و باره‌گه‌هێن فه‌رمی و ده‌زگه‌هێن ئه‌منی.
ئه‌و ژی گۆتییه: داخوازێ دكهین خۆنیشانده‌ر خۆ كۆنترۆل بكه‌ن و باوه‌ری ب یاسا و ده‌ستوور و شه‌رعیه‌تا ده‌ستووری هه‌بیت بۆ خۆنیشاندانێن ئاشتییانه، كو به‌رگری بیت ژ ده‌وله‌تێ و شه‌رعیه‌تا وێ و سازی یێن وێ، به‌ری هه‌موویان ده‌ستهه‌لاتا دادوه‌ری و یاسادانانێ و ژ وان ده‌ست درێژیكرنێن مه‌ترسیدار راوه‌ستن و ژ یاسایێ ده‌رنه‌چن.
ئاماژه ب هندێ دایه: عێراق و شه‌رعیه‌تا وێ و سازی یێن ده‌ستووری و ئاشتییا خه‌لكێ وێ هێلا سۆرن و دڤێت هه‌ر عێراقییه‌ك یێ ئاماده بیت ب شێوه‌كێ ئاشتییانه به‌رگرییێ ژێ بكه‌ت.
