ئهڤرۆ 38 ساڵ لسەر تاوانا ئەنفالکرنا بارزانیاندا دەرباز دبن، ئەنفالکرنا بارزان تاوانەکا دی یا رژێما بەعسا ژناڤ چووی بوو، ژ بۆ نەھێلان و ژناڤبرنا ناسناما گەلێ کورد، كو تێدا 8 هزار بارزانی ئهنفالكرن.
ئەنفالا بارزانیان ل دەسپێکێ ب ڤەگوھاستنێ ژ جھێن وان یێن رەسەن بۆ بیابانێن باشوورێ عێراقێ دەستپێکر، پاشی گۆندێن وان وێرانکرن، رهز و بیستانێن چاندی و شین کری سۆتن، ژینگەھـ تێکدا و پەزو چەروان و بەرهەمێن چاندنێ دزین و تاڵانکرن.
بەری هەوا ئەنفالکرنێ و ل سالا 1975، بارزانی بۆ باشوورێ عیراقێ ڤەگوھاستبوون و ل سالا 1980 جارەکا دی زڤراندنە کەمپێن قوشتەپە و ل هەردوو کومەلگەھێن “قودس و قادسیە” ئاکنجیکرن، بەری وی دەمی ژی ل سالا 1978 بەشەکێ دی یێ بارزانیان ل جھێن خۆ یێن رەسەن مابوون، لێ ئەو ژی بۆ کەمپێن (دیانا، هەریر، بەحركێ و گۆڕەتوو) ڤەگۆھاستن، بارزانی دناڤ وان کەمپان دا ل ژێر چاڤدێريا دژوار یا لەشکەری دا کومکرن و سەرەدەریەکا گەلەک خراب دگەل ئەنجامدا.
ل دوماھیا تەموزا سالا 1983، رژێما بەعس دەست ب گرتنا وان زەلام و گەنجێن بارزانیا کر، یێن کو ل کومەلگەھـ و کەمپان ئاکنجی کرین، پشتی دەستەسەرکرنا وان ڤەگۆھاستنە پارێزگەھا موسەنا.
ل ناڤەراستا مەھا ئابا سالا 1983، جارەکا دی هێزێن حکومەتا بەعس و سیخۆریێن رژێمێ، مال ب مال لێگەریان ل جھێن بارزانی لێ د ئاکنجی ئەنجامدا و ئەو زەلام و زارۆکێن خۆ ڤەشارتین ژی دەستەسەرکرن و بێ سەرو شوین کرن.
گەلێ کورد ب درێژاھیا دیرۆکێ ژ ئەگەرێ نەبوونا وەلاتێ خۆ یێ سەربەخۆ ، د گەلەک جینۆسایدێن دەستھەلاتێن داگیرکەر و شوفینی دەربازبوویە، داگيركهرێن كوردستانێ هەردەم گیانی برایەتی و مرۆڤ دوستیا گەلێ کورد بخۆ ب دەلیڤە دیتیە، ھەر دەمەکێ گەلێ کورد بھێز کەفتی بیت دوژمنێن کوردان رێکا دژی مرۆڤایەتی و کۆشتن و تالان و دزیکرن ل دژی نەتەوێ کورد ئەنجامدایە.
لێ گەلێ کورد د چ دەمەکیدا دەست بەرداری مافێن رەوایێن خۆ نەبوویە و ب هزاران شەھید د شۆڕهش و قوناغێن دژوار دا پێشکێشی ئاخا پیرۆز و کوردستانێ کرینە.
