ئهڤرۆ دوشهمبی 15 ى تهباخا 2022 ێ، رێڤهبهریيا گشتى يا كاروبارێن ئێزدیيان ل وهزارهتا ئهوقاف و كاروبارێن ئايينى يا حكومهتا ههرێما كوردستانێ، بيرهوهريێن كۆمكوژيێن گرعزێر و سيبا شێخدرێ و تاوانا ل دژى ئێزدیيان ل گوندێ كۆچۆ هاتيیه كرن ب چهندين چالاكيیان ساخكر.
ب ئامادەبوونا د. پشتیوان سادق، وهزيرێ ئەوقاف و کاروبارێن ئایينی و بابەشێخی ئێزدییان و ئەندامێن پەرلەمانێ کوردستانێ و عێراقێ و پارێزگارێ هەولێرێ و کونسول و نوونەرێن وهلاتان ل هەرێما کوردستانێ و چەندین کەساتيیان، سالڤهگهرا بيرهوهريێن كۆمكوژيێن گرعزێر و سيبا شێخدرێ و تاوانا ل دژى ئێزديان ل گوندێ كۆچۆ هاتيیه كرن هاته ساخكرن.
ل دهستپێكێ “سعود مستۆ” رێڤهبهرێ گشتى يێ كاروبارێن ئێزديیان پهيڤا بخێرهاتنێ پێشكێشكر و دياركر؛ ساخكرنا ڤان جۆره چالاكيان ل ههولێرا پايتهخت ئێك ژ ئارمانجێن سهرهكى يێن رێڤهبهريا مهيه، بۆ هندێ پتر خزمهتا كهسوكارێن قوربانيان بهێته كرن و ب تايبهتی ژ ئاليێ جينۆسايد ناساندنێ ڤه، ژبەرکو ههولێر جهێ بريارێ يه، مه گهلهك ب گرنگ زانى كو ل ههولێرا پايتهخت ڤان ههردو بيرهوهريێن ناخ ههژين يێن وژدانا مرۆڤايهتيێ ههژاندين ساخ بكهین.
لدووڤدا پێشانگهههكا فۆتۆگرافى كو پرانيیا وێنان دهربرين ژ ئێش و ئازارێن ئێزدیيان ل شنگال دكرن ب تايبهتی ژى ههردو كۆمكوژيێن گرعزێر و سيبا شێخدرێ و تاوانا ل دژى ئێزدیيان ل گوندێ كۆچۆ هاتیيه كرن.
ههروهسا چهندين كهلوپهلێن تايبهت يێن پاشماوێن قوربانيێن جينۆسايدا ئێزدیيان د وێ پێشانگههێ دا هاتنه پيشاندان، ئهو كهلوپهله ژئالیيێ “بههزاد فهرحان” ڤه هاتبوونه ئامادهكرن ب رێيا رێڤهبهریيا گشتى يا كاروبارێن ئێزدیيان.
