ئوردنێ دانپێدان ب 9 نه‌خۆشخانه‌یێن هه‌رێما كوردستانێ بۆ پرۆگرامێ راهێنانێن نوشدارى كر

په‌یڤدارێ ساخله‌مییا سلێمانییێ سامان شێخ له‌تیفى دراگه‌هاندنه‌كێ دا ئاماژه‌ ب هندێ دا، جڤاتا نوشدارى یا ئوردنێ دنڤیساره‌كا فه‌رمیدا كو ئیمزایا سكرتێرێ گشتى یێ جڤاتێ د.محه‌مه‌د مووسای ل سه‌ره‌، ره‌زامه‌ندى ل سه‌ر دانپێدانێ ب 9 نه‌خۆشخانه‌یێن هه‌رێما كوردستانێ كر، چار یێن باژێرێ سلێمانییێ نه‌، و سێ دكه‌ڤنه‌ پارێزگه‌ها دهۆكێ و دوو نه‌خۆشخانه‌یێن هه‌ولێرێ نه‌.

ئه‌ڤ دانپێدانه‌ دێ بیته‌ ئه‌گه‌ر هه‌ماهه‌نگییه‌كا زێده‌تر دناڤبه‌را هه‌رێما كوردستانێ و وه‌لاتێ ئوردنێ دا بهێته‌ كرن، و خوێندكارێن ساخله‌مییێ ل هه‌رێمێ دشێن پشكدارییێ د تاقیكرنێن بۆردێ ئوردنێ دا بكه‌ن.

په‌یڤدارێ ساخله‌مییا سلێمانییێ گوت ژى : ئه‌ڤ دانپێدانا فه‌رمى وه‌كو به‌رسڤه‌كێ بۆ جڤاتا كوردستانێ یا بسپۆرییێن ساخله‌مییێ ده‌رباره‌ى ب ده‌ستڤه‌ئینانا دانپێدانێن جڤاتا نوشدارێن ئوردنێ بۆ ژماره‌كا نه‌خۆشخانه‌ و پرۆگرامێن راهێنانان ل هه‌رێما كوردستانێ بوو.