رێڤه‌به‌رییا پۆلیسێن پارێزگه‌ها دهۆكێ روونكرنه‌ك ل دوور بابەتێ ( Z media ) به‌لاڤكر.
رێڤه‌به‌رییا پۆلیسێن دهۆكێ دیاركر، پشتی دماوێ بووریدا بابەتێ (Z medya) ل سوشیال میدیا و راگەهاندێن عراقێ و هەرێما کوردستانێ ب تایبەت پارێزگەها دهوکێ هاتییە ئازراندن هەر ئێکسەر رێڤەبەرییا پۆلیسێن پارێزگەها دهوکێ دوڤچوونا ئەڤی بابەتی کرییە، هەر چەندە ل هەموو نڤێسینگەهێن نەهێلانا گونەهبارییان و بنگەهێن پۆلیسان چ سکالا نەهاتینە تۆمارکرن و چ قوربانییان بۆ ئەڤی بابەتی سەرەدانا دادگەهان نەکرییە بەلێ رێڤەبەرییا پۆلیسێن پارێزگەها دهۆکێ دوڤچوونا بابەتی کرییە و زانیاری ب هویری ل سەر وێب سایتی ناڤبری کۆمڤەکرینه.
زێده‌تر ئاشكراكر د دوڤچوونا پۆلیسان دا دیاربوویە ل دەستپێکا سالا (2022)ێ وێب سایت هاتییە درووستکرن ژلایێ چەند کەسێن نەنیاس ڤە ژدەرڤەی هەرێما کوردستانێ و ل هەیڤا (5 ) ل پارێزگەها دهۆکێ دناڤ وەلاتییاندا بەلاڤ بوویە پشتی چەند وەلاتییان قازانج کری .
هه‌روه‌سا گوت : د لێگەریان و دوڤچوونا بابەتی دا بۆ پۆلیسان دیاربوویە کو چ نوونەر یان نڤێسینگەهـ و کارگێرییەکا وێب سایتێ (Z medya) ل هەرێما کوردستانێ و پارێزگەها دهۆکێ نینە وژلایێ گرۆپەکی ڤە بناڤێ کۆمپانیێ ژدەرڤەی وەلاتی کار دگەل یوزەرێن خوه کرییە و وێب سایت و تیلگرام و هەموو لاپەرێن تورێن جڤاکی درووست کرینە و برێکا پارێ ئەلکترونی کار کرییە .
دهێته زانین چەندین جاران مە وەلاتی ژ کارێن فێلبازیێ ئاگەهدار و هشیارکرینە و خواستیە پتر دچاڤ ڤەکری بن ل دەمێ مامەڵەکرنێ و دخۆش باوەرنەبن، ژبه‌ركو تاوانێن ئەلکترونی ل هەمی جیهانێ دزوربوونێ دانە وهەتا وەلاتێن پێشکەڤتی ژی ل هەموو ده‌مان نەشێن کونترۆل بکەن، ئەڤجا یا باشترە سەرەدەرییەکا باشتر و درووستتر دگەل تەکنەڵوجیا و دراڤێ ئەلکترونی بکەین، ژبه‌ركو رەنگە ل دەمێن داهاتی ژی هەمان سیناریو ل ژێر هندەک دروشم و ناڤ و کومپانیێن دی دووبارە ببن ، داکو زێدەتر وەلاتی نەبیتە قوربانی وەکو بابەتێ ڤێ کومپانییێ کو چەند کەسەکان ل هەیڤێن دەستپێکێ قازانج کر و دخۆش باوەربوون و چەندین وەلاتی دووڤ خۆدا کرنە قوربانی و زیانێن مەزن بەر بوان کەڤتن .
