پارتی دخوازیت ل گەل ھەلبژارتنان راپرسی ل سه‌ر ده‌ستوورێ هه‌رێمێ ژی بهێته‌ كرن

ئاژانسا خانی ” تایبەت:

سەرۆکێ فڕاکسیۆنا پارتی ل پەرلەمانێ کوردستانێ ئاشکرا کر: پارتی دخوازیت پڕۆژێ ده‌ستوورێ ھەرێما کوردستانێ بھێتە بەرھەڤکرن و ل گەل برێڤەچوونا ھەلبژارتنێن داھاتی بکەڤیتە راپرسییێ، داكو خەلک دەنگی ل سەر ده‌ستوورێ هه‌رێمێ بدەن.

زانا مەلا خالد، سەرۆکێ فڕاکسیۆنا پارتی ل پەرلەمانێ کوردستانێ بۆ ئاژانسا خانی دیار کر” بەری نوکە پتری ٧٠ مادێن پڕۆژێ ده‌ستوورێ ھەرێما کوردستانێ ھاتینە نڤێسین و پێشنیار دکەین بۆ دوبارە دەستپێکرنا پڕۆژێ ده‌ستووری مفا ل ئەڤان مادێن ھاتینە تەمام کرن بهێته‌ وه‌رگرتن، زۆربەیا ھێزێن سیاسی ل سەر ده‌ستووری ئێک ھەلویست ھەیە، ئەو بابەتێن بۆچوونێن جۆدا ل سەر ھەین” دشێین دانوستاندنان ل سەر بکەین و بگەھینە رێکكەفتنێ.

ناڤهاتی گۆت ژی: ” پارتی دخوازیت پڕۆژێ ده‌ستووری بھێنە بەرھەڤکرن و د ھەلبژارتنێن داھاتی ل گەل برێڤەچوونا پرۆسا ھەلبژارتنان ده‌ستوور ژی بکەڤیتە راپرسییێ و وەلاتیێن ھەرێما کوردستانێ دەنگی ل سەر بدەن، د کۆمبوونا بۆری دا ھەموو لایەنێن سیاسی ل گەل دەستپێکرنا بەرھەڤی یێن ده‌ستوورێ ھەرێما کوردستانێ بوون، ب تنێ ئێک کۆتلا سیاسی نەبیت ئەو ژی نەوەی نوێ ل گەل بۆچوونا لایەنێن سیاسی نەبوو.